विजेट आपके ब्लॉग पर

Thursday, January 12, 2017

विश्वप्रसिद्ध रूसी नाटक "इंस्पेक्टर" ; अंक-1 ; दृश्य-4



दृश्य-4
(मेयर, बोबचिन्स्की, दोबचिन्स्की आउ पुलिस के सिपाही)

मेयर - की, द्रोश्की तैयार हइ ?
सिपाही - जी, तैयार हइ ।
मेयर - चल, रोड पर ... चाहे नयँ, ठहर ! चल, लेके आव ... लेकिन आउ दोसर लोग काहाँ हइ ? की वास्तव में तूँ अकेल्ले हकँऽ ? हम तो औडर देलियो हल, कि प्रोख़ोरोव के हियाँ होवे के चाही । प्रोख़ोरोव काहाँ हइ ?
सिपाही - प्रोख़ोरोव थाना में हइ, लेकिन ओकरा अभी कोय काम में नयँ लगावल जा सकऽ हइ ।
मेयर - अइसन काहे ?
सिपाही - ऊ अइसे, कि ओकरा सुबहे नीसा में मरल नियन लावल गेलइ । ओकरा पर दू बालटी पानी उझलल जा चुकले ह, लेकिन अभी तक ओकर नीसा नयँ उतरले ह ।
मेयर - (अपन सिर दबोचते) आह, हे भगमान, हे भगमान ! चल, तेजी से रोड पर, चाहे नयँ - दौड़के पहिले कमरा में जो, सुन ! आउ हुआँ से तलवार आउ नयका टोप लेके आव । अच्छऽ, प्योत्र इवानोविच, चल्लल जाय!
बोबचिन्स्की - हमहूँ, हमहूँ ... हमरो आवे के अनुमति देथिन, अन्तोन अन्तोनोविच !
मेयर - नयँ, नयँ, प्योत्र इवानोविच, असंभव, असंभव ! असुविधाजनक हइ, आउ एकरा अलावे द्रोश्की में अँटवो नयँ करते जइबइ ।
बोबचिन्स्की - कोय बात नयँ, कोय बात नयँ, हम अइसीं - पैदले, पैदले द्रोश्की के पीछू-पीछू दौड़ल अइबइ । हम तो खाली दरवजवा के फाँक (chink) से जरी सुन देखबइ, कि ओकर व्यवहार कइसन हइ ...
मेयर - (तलवार लेते, सिपाही के) अभिए दौड़के जो आउ देस्यात्स्की [8] लोग के एकत्र करके, ओकन्हीं में से हरेक के एक-एक लेवे देहीं ... ए, ई तलवार में केतना खरोंच पड़ल हइ ! अभिशप्त घटिया व्यापारी अब्दुलिन - देखऽ हइ, कि मेयर के तलवार पुराना हइ, तइयो नयका नयँ भेजलकइ । ओह, धूर्त लोग ! आउ हमरा लगऽ हइ, धोखेबाज लोग हमरा विरुद्ध चोरी-छिपे अपन-अपन जेभी में याचिका (शिकायत) तैयार रखले हइ । हरेक कोय अपन जिम्मे एक-एक रोड लेइ ... धत्तेरी के, रोड नयँ, एक-एक झाड़ू ! आउ ऊ पूरा रोड साफ करइ, जे सराय तक जा हइ, आउ पूरा साफ-सुथरा होवइ ... सुनलहीं ! आउ देख - तूँ ! तूँ ! हम तोरा जानऽ हिअउ - तूँ हुआँ जे लोग के बात में फँसाके चानी के चम्मच अपन जुत्ता में सरका लेहीं - देख, हमर कान तेज हउ ! ... तूँ व्यापारी चेर्न्यायेव के साथ की कइलहीं - ऐं ? ऊ तोरा वरदी लगी दू अर्शीन (1 अर्शीन = 28 इंच) कपड़ा देलकउ, आउ तूँ पूरा थान पार कर लेलहीं । देख ! अपन रैंक से जादे नयँ लीहँऽ ! जो, भाग !


सूची            पिछला                     अगला