विजेट आपके ब्लॉग पर

Thursday, May 23, 2013

11 से 20 तक के खोढ़ा (पहाड़ा)

---------------------------------
11 x 1 से ले के 11 x 10 तक   
---------------------------------
11    एगरका एगारऽ
22    एगारऽ दूनी बाइस
33    एगारऽ तिया तेतीस
44    एगारऽ चौ चौवालीस
55    एगारऽ पचे पचपन
66    एगारऽ छक छियासठ
77    एगर सते सतत्तर
88    एगारऽ अठी अठासी
99    एगर नमा निनानबे
110    एगर दहैं दहोतल से

---------------------------------
12 x 1 से ले के 12 x 10 तक   
---------------------------------
12    बरका बारऽ
24    बारऽ दूनी चोबीस
36    बारऽ तिया छत्तीस
48    बारऽ चौ अड़तालीस
60    बारऽ पचे साठ
72    बारऽ छक बहत्तर
84    बर सते चौरासी
96    बरऽ अठी छियानबे
108    बर नमा अठोतल से
120    बारो दहैं बीसा से

---------------------------------
13 x 1 से ले के 13 x 10 तक   
---------------------------------
13    तेरका तेरऽ
26    तेरऽ दूनी छब्बीस
39    तेर तिया उनचालीस
52    तेरऽ चौ बावन
65    तेरऽ पचे पैंसठ
78    तेरऽ छक अठत्तर
91    तेर सते एकानबे
104    तेरऽ अठी चलोतल से
117    तेर नामा सतराहाँ से
130    तेरो दहैं तीसा से

---------------------------------
14 x 1 से ले के 14 x 10 तक   
---------------------------------
14    चौदका चौदऽ
28    चौ दूनी अठाइस
42    चौ तिया बियालीस
56    चौदऽ चौ छप्पन
70    चौदऽ पचे सत्तर
84    चौदऽ छक चौरासी
98    चौद सते अनठानबे
112    चौदऽ अठी बरयोतल से
126    चौद नमा छबील से
140    चौदो दहैं चाल से

---------------------------------
15 x 1 से ले के 15 x 10 तक   
---------------------------------
15    पनरका पनरऽ
30    पनरऽ दूनी तीस
45    पनर तिया पैंतालीस
60    पनरऽ चौ साठ
75    पनरऽ पचे पचत्तर
90    पनरऽ छकऽ नब्बे
105    पनर सते पचोतल से
120    पनरो अठी बीसा से
135    पनर नमा पैंतीसा से
150    पनरो दहैं डेढ़ सो

---------------------------------
16 x 1 से ले के 16 x 10 तक   
---------------------------------
16    सोलका सोल्लऽ
32    सोलऽ दूनी बत्तीस
48    सोल तिया अड़तालीस
64    सोलऽ चौ चौंसठ
80    सोलऽ  पचे अस्सी
96    सोल्लऽ छक छियानबे
112    सोल सते बरयोतल से
128    सोलऽ अठी अठइसा से
144    सोल नामा चौआल से
160    सोल्लो दहैं साठ से

---------------------------------
17 x 1 से ले के 17 x 10 तक   
---------------------------------
17    सऽतरका सतरऽ
34    सतरऽ दूनी चौंतीस
51    सतर तिया एकामन
68    सतरऽ चौ अड़सठ
85    सतरऽ पचे पचासी
102    सतरऽ छकम दोतल से
119    सतर सते उनइसा से
136    सतरो अठी छतील से
153    सतर नामा तिरपन्ना से
170    सतरो दहैं सत्तर से

---------------------------------
18 x 1 से ले के 18 x 10 तक   
---------------------------------
18    अठरका अठारऽ
36    अठारऽ दूनी छत्तीस
54    अठारऽ तिया चौवन
72    अठर चौका बहत्तर
90    अठारऽ पचे नब्बे
108    अठारऽ छक अठोतल से
126    अठर सते छबील से
144    अठारऽ अठी चौआल से
162    अठर नामा बरसट्ठा से
180    अठारो दहैं सिया से

---------------------------------
19 x 1 से ले के 19 x 10 तक   
---------------------------------
19    उनैसका उनैस
38    उनै दूनी अड़तीस
57    उनै तिया सनतावन
76    उनै चौ छियत्तर
95    उनै पचे पनचानबे
114    उनै छकऽ चौदहाँ से
133    उनै सते तेतील से
152    उनै अठी बबन्ना से
171    उनै नमा एकतरा से
190    उनै दहैं नब्बे से

---------------------------------
20 x 1 से ले के 20 x 10 तक   
---------------------------------
20    बीसका बीस
40    बी दूनी चाली
60    बी तिया साठ
80    बी चौ अस्सी
100    बी पचे सौ
120    बी छकऽ बीसा से
140    बी सते चाल से
160    बी अठी साठ से
180    बी नमा को सिया से
200    बी दहैं कि दू सो

21 से 30 तक के खोंढ़ा (पहाड़ा)

----------------------------------
21 x 1 से ले के 21 x 10 तक   
----------------------------------
21    एकैसका एकैस
42    एकै दूनी बियाली
63    एकै तिया तिरेसठ
84    एकै चौ चौरासी
105    एकै पचे पचोतल से
126    एकै छक छबील से
147    एकै सते सनताल से
168    एकै अठी अड़सट्ठा से
189    एकै नमा नबऽसिया से
210    एकै दहैं दू से दस

----------------------------------
22 x 1 से ले के 22 x 10 तक   
----------------------------------
22    बैसका बाइस
44    बै दूनी चौआली
66    बै तिया छियासठ
88    बाय चौ अठासी
110    बै पचे दहोतल से
132    बाय छक बतील से
154    बै सते चहुन्ना से
176    बै अठी छियन्तरा से
198    बै नमा अनठानुँ से
220    बाय दहैं दू से बीस

----------------------------------
23 x 1 से ले के 23 x 10 तक   
----------------------------------
23    तेइसका तेइस
46    तेय दूनी छियाली
69    तेय तिया उनत्तर
92    तेय चौ बानबे
115    तेय पचे पनराहाँ से
138    तेय छक अड़तील से
161    तेय सते एकसट्ठा से
184    तेय अठी चौरसिया से
207    तेय नामा दू से सात
230    तेय दहैं दू से तीस

----------------------------------
24 x 1 से ले के 24 x 10 तक   
----------------------------------
24    चोबीसका चोबीस
48    चोबी दूनी अड़ताली
72    चोबी तिया बहत्तर
96    चोबी चौ छियानबे
120    चोबी पचे बीसा से
144    चोबी छक चौआल सौ
168    चोब सते अड़सट्ठा से
192    चोबी अठी बानुँ से
216    चोबी नमा दू सोल्लऽ
240    चोबी दहैं दू से चालीस

----------------------------------
25 x 1 से ले के 25 x 10 तक   
----------------------------------
25    पचीसका पचीस
50    पची दूनी पचास
75    पची तिया पचत्तर
100    पची चौ सो
125    पची पचे पचीसा से
150    पची छकम डेढ़ सो
175    पची सते पचतरा से
200    पची अठी दू सो
225    पची नमा दू पची
250    पची दहैं अढ़ाय सो

----------------------------------
26 x 1 से ले के 26 x 10 तक   
----------------------------------
26    छऽबीसका छब्बीस
52    छब्बी दूनी बावन
78    छबी तिया अठत्तर
104    छब्बी चौ चलोतल से
130    छब्बी पचे तीसा से
156    छब्बी छक छपन्ना से
182    छब सते बेरसिया से
208    छब्बी आठ दू से आठ
234    छब्बी नमा दु तीन चार
260    छब्बी दहैं दू से साठ

----------------------------------
27 x 1 से ले के 27 x 10 तक   
----------------------------------
27    सतैसका सताइस
54    सताय दूनी चौवन
81    सतै तिया एकासी
108    सताय चौ अठोतल से
135    सतै पचे पैंतील से
162    सताय छकम बासठ से
189    सतै सते नबऽसिया से
216    सताय आठ दू सोल्लऽ
243    सताय नमा दू तेताल
270    सतै दहैं दू सत्तर

----------------------------------
28 x 1 से ले के 28 x 10 तक   
----------------------------------
28    अठैसका अठाइस
56    अठाय दूनी छप्पन
84    अठै तिया चौरासी
112    अठाय चौ बरयोतल से
140    अठाय पचे चाल से
168    अठाय छक अड़सट्ठा से
196    अठय सते छियनुआँ से
224    अठाय आठ दू चोबसा
252    अठय नमा दू बावना
280    अठाय दहैं दू से अस्सी

----------------------------------
29 x 1 से ले के 29 x 10 तक   
----------------------------------
29    उनतीसका उनतीस
58    उनती दूनी अनठावन
87    उनती तिया सतासी
116    उनती चौ सोलहाँ से
145    उनती पचे पैंताल से
174    उनती छक चहुँतरा से
203    उनती सते दू से तीन
232    उनती अठी दू बतील
261    उनती नामा दू एकसट्ठे
290    उनती दहैं दू से नब्बे

----------------------------------
30 x 1 से ले के 30 x 10 तक   
----------------------------------
30    तीसका तीस
60    ती दूनी साठ
90    ती तिया नब्बे
120    ती चौ बीसा से
150    ती पचे डेढ़ सो
180    ती छकम सिया से
210    ती सते दू दस
240    ती अठी दू चाली
270    ती नमा दू सत्तर
300    ती दहैं को तीन सौ

गरहाँ के खोंढ़ा (पहाड़ा)

---------------------------------
11 x 11 से ले के 11 x 20 तक   
---------------------------------
121    एगर गरहाँ एकैल से
132    एगर बरहाँ बतील से
143    एगर तेरे तेताल से
154    एगर चौदे चहुन्ना से
165    एगर पन्ना पैंसट्ठा से
176    एगार सोल छियन्तर से
187    एगर सतराहाँ सतासी से
198    एगारऽ अठा अठनौअल से
209    एगारऽ उनैसे दू से नो
220    एगारऽ बीसे दू से बीस

---------------------------------
12 x 11 से ले के 12 x 20 तक
---------------------------------
132    बर गरहाँ बतील से
144    बर बरहाँ चौआल से
156    बर तेरे छपन्ना से
168    बर चौदे अड़सट्ठा से
180    बारो पन्ना सीया से
192    बारो सोलहाँ बानुँ से
204    बर सतरैयें दू चलोतल
216    बरऽ अठा दू सोल्लऽ
228    बारऽ उनैसे दू अठैसे
240    बारऽ बीसे दू से चाली

---------------------------------
13 x 11 से ले के 13 x 20 तक   
---------------------------------
143    तेर गरहाँ तेताल से
156    तेर बरहाँ छपन्ना से
169    तेर तेरे उनत्तर से
182    तेर चौदे बेरासी से
195    तेरऽ पना पनचानुँ से 
208    तेर सोलहाँ दू से आठ
221    तेर सतरैयें दू एकैल
234    तेरऽ अठा दू चौंती
247    तेरऽ उनैसे दू सनताल
260    तेरऽ बीसे दू से साठ

---------------------------------
14 x 11 से ले के 14 x 20 तक   
---------------------------------
154    चौद गरहाँ चहुन्ना से
168    चौद बरहाँ अड़सट्ठा से
182    चौ तेरे बेरासी से
196    चौद चौदे छियानुँ से
210    चौद पनैमा के दू से दस
224    चौद सोलहाँ दू चोबी
238    चौद सतरैयें दू अड़तील
252    चौदऽ अठा दू बावना
266    चौदऽ उनैसे दू छियासठ
280    चौदऽ बीसे दू से अस्सी

Wednesday, May 15, 2013

86. "मगही पत्रिका" (वर्ष 2012: नवांक-7; पूर्णांक-19) में प्रयुक्त ठेठ मगही शब्द



मपध॰ = मासिक "मगही पत्रिका"; सम्पादक - श्री धनंजय श्रोत्रिय, नई दिल्ली/ पटना

पहिला बारह अंक के प्रकाशन-विवरण ई प्रकार हइ -
---------------------------------------------
वर्ष       अंक       महीना               कुल पृष्ठ
---------------------------------------------
2001    1          जनवरी              44
2001    2          फरवरी              44

2002    3          मार्च                  44
2002    4          अप्रैल                44
2002    5-6       मई-जून             52
2002    7          जुलाई               44
2002    8-9       अगस्त-सितम्बर  52
2002    10-11   अक्टूबर-नवंबर   52
2002    12        दिसंबर             44
---------------------------------------------
मार्च-अप्रैल 2011 (नवांक-1; पूर्णांक-13) से द्वैमासिक के रूप में अभी तक 'मगही पत्रिका' के नियमित प्रकाशन हो रहले ह । प्रस्तुत अंक : नवांक-7, पूर्णांक-19, मार्च-अप्रैल 2012

ठेठ मगही शब्द के उद्धरण के सन्दर्भ में पहिला संख्या प्रकाशन वर्ष संख्या (अंग्रेजी वर्ष के अन्तिम दू अंक); दोसर अंक संख्या; तेसर पृष्ठ संख्या, चउठा कॉलम संख्या (एक्के कॉलम रहलो पर सन्दर्भ भ्रामक नञ् रहे एकरा लगी कॉलम सं॰ 1 देल गेले ह), आउ अन्तिम (बिन्दु के बाद) पंक्ति संख्या दर्शावऽ हइ ।

कुल ठेठ मगही शब्द-संख्या (अंक 1-18 तक संकलित शब्द के अतिरिक्त) - 168

ठेठ मगही शब्द ( से तक):

1    अँखलड़ौअल (सत्येंद्र जमालपुरी के लिखल अउ 1978 ई. में छप्पल 'चुटकी भर सेनुर' नान्ह उपन्यास में दहेज विरोधी स्वर मुखरित हे । ... अप्पन नानीघर नेहालपुर में प्रेमा नाम के शांत, सुशील, धीर-गंभीर, सुत्थर लड़की से 'हीरू' के अँखलड़ौअल आउ गहीड़ परिचय हो गेल ।)    (मपध॰12:19:17:2.39)
2    अगलगाउन (अगलगाउन भी ऊ कम नञ् हे । काहे कि पंचायतो के बात ऊ घरे-घर फैला दे हे - के केकरा बारे में कि बोल रहल हल ।)    (मपध॰12:19:44:1.27)
3    अघाना (खीर, आलू-कोबी के सब्जी, आलू के भुँजिया, अचार, चटनी आउ ऊपर से एक-एक गिलास राबड़ी । घर के दूध हल । अघा-अघा के दुन्हुँ बरतुहार जमलन ।)    (मपध॰12:19:41:2.37)
4    अझात (भोला संग सोवरनी के असफल बिआहे ओकर जीवन ओकर जीवन के रिक्तता अउ कटुता के अझात कारन हे ।)    (मपध॰12:19:13:2.4)
5    अदउ (= अदऊ; आदिकाल; पुराना जमाना; अनेक पीढ़ियों का क्रम) ('कसइलीचक' आउ ओहमें बसल मुसहरटोली के मिलाके जे संस्कृति उभरऽ हे ऊ हे - खेतिहर संस्कृति । ... आजादी के बाद नयकी चेतना गते-गते ई गाँव में ढुकऽ हे । किसान-मजूर के बीच अदउ से चलल आ रहल संबंध में खटास आवऽ हे ।)    (मपध॰12:19:13:1.36)
6    अधपकल (बरतुहार कहलका कि इहाँ से बजार तीन कोस हे, से फल लावे में तो मुहुर्ते निकल जात । अइसन करऽ छोटे बाबू कि एतबर गो गाँव हे, केकरो बगीचा या घरदुआरी से अमरूद, पपीता, मुरय ई सब तो मिलिए जइतो । बरतुहार के बात में दम हल । जने-तने से छोटे बाबू दू गो मुरय, तीन गो अमरूद आउ एगो अधपकल पपीता खोज के अपन बेटा के फलदान ले जुगाड़ कइलन ।)    (मपध॰12:19:42:1.4)
7    अनगुते (आँय रे बुड़बक्खा, गुलरिया दने पानी तीन दिन से घूरल हउ आउ तोर खेत सूखल ठन-ठन हउ । खाली फागू चा के खेता से दू गो खँड़हो काट देंहीं, बस, बीस-पच्चीस मिनट में तो दहापोरे कर देतउ । - वाह वाह ! बड़का खोसी के बात बतइलऽ सुक्खी चा । अनगुते हम ई काम के निपटा देम ।)    (मपध॰12:19:41:1.27)
8    असगरे (दे॰ एकसरे; अकेला) (शीघ्र ही भीतर से बुलावा आ गेल । हमहूँ स्वामी जी भीर पहुँच गेली । उ कमरा में असगरे हलन ।)    (मपध॰12:19:49:3.21)
9    आँय (आँय रे बुड़बक्खा, गुलरिया दने पानी तीन दिन से घूरल हउ आउ तोर खेत सूखल ठन-ठन हउ । खाली फागू चा के खेता से दू गो खँड़हो काट देंहीं, बस, बीस-पच्चीस मिनट में तो दहापोरे कर देतउ ।)    (मपध॰12:19:41:1.22)
10    आरन (रूसी उपन्यासकार शोलोखोव अप्पन 'वर्जिन स्वायल अपटर्न्ड' उपन्यास में जउन रूप से रूसी क्रांति के सफलता के बाद उहाँ के प्रचलित स्थनात्मक कार्यक्रम के प्रगति में भितरिया रुचि ला आरन कैलक हे उहे ढंग से डॉ. रामनंदन भी अप्पन उपन्यास 'आदमी आ देउता' में अप्पन देस के रचनात्मक विकास खातिर मसगूल लौकऽ हथ ।)    (मपध॰12:19:14:2.41)
11    इद्धिर (= एद्धिर; इधर) (एक दिन आयल जब गाँव के सहजोग से आसो चा के रंथी उठल तब उनका पर दू गज कफन भी नञ् हल । इद्धिर बिंदो का के खेत में टरेक्टर चल रहल हल, उद्धिर चाची 'रजउ हो रजउ' कहके पछाड़ खा रहलन हल ।)    (मपध॰12:19:47:1.42)
12    इलिम (= इल्म) (समय के थपेड़ा जे हमरा ढेरमनी इलिम सिखा देलकइ हल, ऊ थोड़े-थाड़ काम अइलइ आउ हमर ई सफर थोड़े असान हो गेलइ ।)    (मपध॰12:19:5:1.3)
13    उद्धिर (= ओद्धिर; उधर) (एक दिन आयल जब गाँव के सहजोग से आसो चा के रंथी उठल तब उनका पर दू गज कफन भी नञ् हल । इद्धिर बिंदो का के खेत में टरेक्टर चल रहल हल, उद्धिर चाची 'रजउ हो रजउ' कहके पछाड़ खा रहलन हल ।)    (मपध॰12:19:47:1.43)
14    उपासल (रमधनिया अप्पन मेहरारू के पंचायत लगावे पर मने-मन खूब खौंतऽ हे, मुदा मुँह से बकार निकासे में सकुचा हे । काहे कि कभी-कभी बकार निकासे पर ओकर मेहरारू ओकरे खूब फटकारऽ हे आउ दिन भर खटवास-पटवास लेके चूल्हा-चाकी के उपासले छोड़ दे हे ।)    (मपध॰12:19:44:1.17)
15    उसाहना (बुलकनी के आँसू देख के उनकर बुढ़ाल नस में गोस्सा से खून दौड़े लगल । ऊ छेंड़ी उसाह के काकी के पीठ पर बजारो लगल ।)    (मपध॰12:19:45:1.21)
16    एतबर (दे॰ एतबड़) (बरतुहार कहलका कि इहाँ से बजार तीन कोस हे, से फल लावे में तो मुहुर्ते निकल जात । अइसन करऽ छोटे बाबू कि एतबर गो गाँव हे, केकरो बगीचा या घरदुआरी से अमरूद, पपीता, मुरय ई सब तो मिलिए जइतो । बरतुहार के बात में दम हल । जने-तने से छोटे बाबू दू गो मुरय, तीन गो अमरूद आउ एगो अधपकल पपीता खोज के अपन बेटा के फलदान ले जुगाड़ कइलन ।)    (मपध॰12:19:41:3.41)
17    ओजूद (भला बतवल जाय कि केकरो कमजोड़ कह-कह के ओकर ओजूद तू समाज में बरियार बना सको हे ? अरे, ई जमाना हे नारी के, ई जमाना हे नारी सशक्तीकरण के ।)    (मपध॰12:19:43:2.5)
18    ओरा (= ओकरा; उसे, उसको) (ई तो ठीक बात हे कि सृष्टि के चलवे खातिर नारी आउ नर के अपन-अपन हिसाब से कोय-कोय अंग एक नियन आउ कोय-कोय अंग अलग-अलग बनइलन कि दुन्हुँ के एक-दोसर लेल लगाव बनल रहे आउ ई सृष्टि अनंतकाल तक चलइत रहे बकि नारी के मोंछ नञ् देके ओरा साथे एकदम अनाचार कर देलन ।)    (मपध॰12:19:43:1.11)
19    ओहजे (= ओहिजे, ओज्जे; उसी जगह) (धीरे-धीरे गैंठ खोल के जूता निकाल के लात से मार के चौकी के अंदर कर देलका औतार सिंह । ओहजे खूँटी पर हरदी लगल गंजी आउ कमीज टंगल हल । लेकिन ओकरा फिन से पहिने के हिम्मत उनखा में नञ् हे ।)    (मपध॰12:19:42:3.9)
20    ओहमा-टोटका (~ मारना = जादू-टोना करना)     (मपध॰12:19:53:1.9)
21    औली-चौली (~ मारना =  कटाक्ष करना, व्यंग्य वाण बरसाना)     (मपध॰12:19:53:1.10)
22    कड़रू (छोटे बाबू भैंस के सानी-पानी दे रहला हल । खुसी में कुछ दूध कड़रू ले छोड़ते राम-सलाम कइलका ।)    (मपध॰12:19:41:2.15)
23    कनमटकी (~ मारना = सुनी अनसुनी करना)     (मपध॰12:19:53:1.12)
24    कमजोड़ (= कमजोर) (भला बतवल जाय कि केकरो कमजोड़ कह-कह के ओकर ओजूद तू समाज में बरियार बना सको हे ? अरे, ई जमाना हे नारी के, ई जमाना हे नारी सशक्तीकरण के ।)    (मपध॰12:19:43:2.4)
25    कमजोर-जबर (भगवान के कथा होइत हे, उहो में ऊँच-नीच, कमजोर-जबर के भेद-भाव हे । सहिए बात हे कि आज के युग में पैसा बोलऽ हे ।)    (मपध॰12:19:49:1.22)
26    करपरताज (बरबीघा में कय जुग से मगही के कोय कार्यक्रम नञ् हो पैले हल । मगही के करपरताज लोग ठीके एकरा ठिकरा मान के छोड़ले हलथिन ।)    (मपध॰12:19:4:1.12)
27    करुआ (~ तेल) (कंघी नञ् करे के चलते उनखर बाल खोंथा से जादे ओझराल हल । भौजी आव देखलका न ताव, एक चुरू करुआ तेल देके कंघी से केस सोझा करे के अथक परयास करे में जुट गेला ।)    (मपध॰12:19:41:3.16)
28    करेजगर (हिंदी में तुलसीदास आउ संस्कृत में कालिदास सबसे करेजगर कवि हलन ।)    (मपध॰12:19:43:1.31)
29    कलखनी (ऊ काकी के हाथ में हुक्का थमा के कहलक - "काकी ! अब हम जाही । पटना जाय घड़ी बिनेसरा हमरा कह गेल हे - 'घर पर तनी धियान दीहऽ ।' "/ काकी - "हाँ दाय ! जा ! कलखनी समाचार लेके अइहऽ ।")    (मपध॰12:19:44:3.29)
30    कलटी (~ मारना = पलटी मारना; गाड़ी आदि का पलट जाना)     (मपध॰12:19:53:1.13)
31    कुरछल-कुँढ़ल (कभी-कभी बकार निकासे पर ओकर मेहरारू ओकरे खूब फटकारऽ हे आउ दिन भर खटवास-पटवास लेके चूल्हा-चाकी के उपासले छोड़ दे हे । ईहे कारण हे कि लाख हल्ला-गुल्ला होवे या झोंट्टम-झोंट्टी, उ बेचारा कुरछल-कुँढ़ल चुपचाप रह जाहे ।)    (मपध॰12:19:44:1.19)
32    केतली (= सन से सुतरी काटने का डेरा) (नन्हकू चा एक पाँजा सनय काँख तर दाबले केतली पर चढ़ल सुतरी के ससार-ससार के समेट रहलन हल । दु-दु गो सनय खींच-खींच के केतली के नचा-नचा के बरियार सुतरी बनाते जा रहलन हल ।)    (मपध॰12:19:41:1.16, 18)
33    कोंचना (छोटे बाबू भैंस के सानी-पानी दे रहला हल । ... औतार सिंह बइठका के भीतर में कुट्टी काट रहला हल । उनखर भौजी नेवारी कोंच-कोंच के मशीन में ठूँस रहला हल ।)    (मपध॰12:19:41:2.18)
34    कोठी-कोठिला (उत्कर्ष कहानी के एगो अइसन तत्व हे जेकरा बिना पढ़कुआ के मन न भर सकऽ हे । जइसे जेठ-बैसाख में नदी के पेट पचक जा हे, आसिन-कातिक में डभक जा हे । ओइसहीं कातिक-अगहन में किसान के कोठी-कोठिला भर जा हे, सावन-भादो आते-आते खलिया जा हे ।)    (मपध॰12:19:8:2.20)
35    कोनाठा (रमधनिया के घर के कोनाठा पर रोज झोंटहा पंथ के पंचायत लगऽ हे । बारह बजते-बजते कोय चरखा-रूई, कोय गेनरा-सुजनी तो कोय ऊन-काँटा लेके ऊहाँ जुट जाहे ।)    (मपध॰12:19:44:1.1)
36    खँड़हो (= खँड़हू, खड़हू) (आँय रे बुड़बक्खा, गुलरिया दने पानी तीन दिन से घूरल हउ आउ तोर खेत सूखल ठन-ठन हउ । खाली फागू चा के खेता से दू गो खँड़हो काट देंहीं, बस, बीस-पच्चीस मिनट में तो दहापोरे कर देतउ ।)    (मपध॰12:19:41:1.24)
37    खटना (ई बात अलग हइ कि ऊ मगही में अभी भर जी चोखइबो नञ् कैलखिन हे । आउ जबसे ऊ मगही में अइलथिन हे, पईंचा लेके पादते रहलथिन हे मगही में, अप्पन कोय औकात नञ् हे उनकर - चाचा भरौंसे गोमस्तगिरी करते रहलथिन हे मगही में । धनंजय श्रोत्रिय नियन खट के देखथिन त कउची तो फटऽ हइ, जे फट के दरवज्जा लग जइतन ।)    (मपध॰12:19:5:1.30)
38    खटवास-पटवास (रमधनिया अप्पन मेहरारू के पंचायत लगावे पर मने-मन खूब खौंतऽ हे, मुदा मुँह से बकार निकासे में सकुचा हे । काहे कि कभी-कभी बकार निकासे पर ओकर मेहरारू ओकरे खूब फटकारऽ हे आउ दिन भर खटवास-पटवास लेके चूल्हा-चाकी के उपासले छोड़ दे हे ।)    (मपध॰12:19:44:1.16)
39    खलियाना (= खाली हो जाना) (उत्कर्ष कहानी के एगो अइसन तत्व हे जेकरा बिना पढ़कुआ के मन न भर सकऽ हे । जइसे जेठ-बैसाख में नदी के पेट पचक जा हे, आसिन-कातिक में डभक जा हे । ओइसहीं कातिक-अगहन में किसान के कोठी-कोठिला भर जा हे, सावन-भादो आते-आते खलिया जा हे ।)    (मपध॰12:19:8:2.21)
40    खुलखुल्ली (~ मारना = सरेआम पिटाई करना)     (मपध॰12:19:53:1.20)
41    खेपी-खेपी (भोर होते, छो-सात बजते इनकर दलान पर चाह-पानी पीएवला के भीड़ जुटे लगल । चाची खेपी-खेपी चाय बनावथ, अपने पीयथ अउ बुतरुन के मार्फत बाहर भेजैते रहथ ।)    (मपध॰12:19:46:3.25)
42    खैनी (कुल्ली करके दुन्हुँ चाय पीलन । उधर छोटे बाबू चुनौटी से खैनी निकाल के महीन-महीन खोंट रहला हल । मन तो अइसहीं हरियर हल । खैनी खाके दूगो लोटा लेले खेत दने मैदान करावे ले रपरपाल जा रहला हल ।)    (मपध॰12:19:42:1.19, 21)
43    खौंतना (रमधनिया अप्पन मेहरारू के पंचायत लगावे पर मने-मन खूब खौंतऽ हे, मुदा मुँह से बकार निकासे में सकुचा हे ।)    (मपध॰12:19:44:1.13)
44    गच्चा (~ मारना = धोखा देना)     (मपध॰12:19:53:1.22)
45    गछेड़ (~ मारना = छोटे पेड़-पौधे का बड़े वृक्ष के प्रभाव/ नीचे आ जाने के कारण धूप नहीं लगने से विकसित नहीं हो पाना)     (मपध॰12:19:53:1.23)
46    गदगरल (फगुनहट खतम होतहीं 'वसंत अंक' अपने के हाँथ में सौंपते थोड़े-थाड़ गुरगुद्दी नियन बुझा रहलै हे हमरा । अइसन नञ् हइ कि फगुआ में अइसन सुतार लगलै कि मन गदगरल हइ ।)    (मपध॰12:19:4:1.2)
47    गिरथैनी (बाजार से रोज मिठाई अउ मछली आवे लगल । कुसल गिरथैनी चाची खूब मसाला-तेल देके बनावे लगलन । दुन्हूँ साढ़ू एक साथ बैठ के खाथ अउ सढ़ुआइन लगी भी केन में ले जाथ ।)    (मपध॰12:19:47:1.24)
48    गुरगुद्दी (फगुनहट खतम होतहीं 'वसंत अंक' अपने के हाँथ में सौंपते थोड़े-थाड़ गुरगुद्दी नियन बुझा रहलै हे हमरा ।)    (मपध॰12:19:4:1.1)
49    गैंठ (= गेंठी) (जूता के फीता पर कइएक गो गैंठ पड़ल हल । धीरे-धीरे गैंठ खोल के जूता निकाल के लात से मार के चौकी के अंदर कर देलका औतार सिंह ।)    (मपध॰12:19:42:3.6, 7)
50    गोमस्तगिरी (ई बात अलग हइ कि ऊ मगही में अभी भर जी चोखइबो नञ् कैलखिन हे । आउ जबसे ऊ मगही में अइलथिन हे, पईंचा लेके पादते रहलथिन हे मगही में, अप्पन कोय औकात नञ् हे उनकर - चाचा भरौंसे गोमस्तगिरी करते रहलथिन हे मगही में । धनंजय श्रोत्रिय नियन खट के देखथिन त कउची तो फटऽ हइ, जे फट के दरवज्जा लग जइतन ।)    (मपध॰12:19:5:1.30)
51    घपक्का (~ मारना = अंदर तक डुबोना)     (मपध॰12:19:53:1.30)
52    घरैया (अरविंद मानव आउ डॉ. भवेश चंद्र पांडेय जी के आभार जता के अपन संबंध के हल्का नञ् करे चाहऽ हिअइ । हमर गारजीयन घमंडी राम जी, मित्र कृष्ण कुमार भट्टा जी आउ भाय गोपाल निर्दोष के घरैया नियन देख के अच्छा लगलै ।)    (मपध॰12:19:4:1.18)
53    घसगढ़नी (आई.ए. के लड़का वसंत अउ घसगढ़नी, अनपढ़ सँवली के बिरादरी अलगे हे । लइका के बाप किसान अउ लड़की के बाप मजूर ।)    (मपध॰12:19:16:3.29)
54    घुकड़ी (~ मारना = ठंढ के मारे हाथ-पाँव सिकोड़कर बैठे या पड़े रहने; दुबक जाना)     (मपध॰12:19:53:1.31)
55    घूरना-घारना (आसो चा धोती-कुरता-बंडी चढ़ा के मुँह में पान चिबैते सौंसे गाँव घुर गेला । मन होल तब किनको दुहारी पर बैठला । जादे दुहारी तो खालिए मिलो हल । किसान के गाँव हल । खेती-बारी के काम में फँसल किसान के फुरसत कहाँ हे कि अप्पन दुहारी पर बैठ सकथ । घूर-घार के इहो अपने दुहारी पर आके बैठ जाथ ।)    (मपध॰12:19:46:3.21)
56    घोंची (अंत में चुप्पी तोड़लक बटेसरी - "तीन महीना से कमली गाँव में नञ् देखाल हे ।" / कैली - "चुप घोंची ! तों कि जानमें ? कमली गाँव में हे । मुदा चार महीना से घर से नञ् निकसऽ हे । जानऽ ह काकी काहे ?")    (मपध॰12:19:44:2.26)
57    घोग्घा (= घुग्घा) (अड़ोस-पड़ोस के मेहरारू सब भी घोग्घा तान के, केवाड़ी तर नुक-नुक के इनका निहारथ अउ घोग्घे तर फुसफुसाथ - अजी कमली माय, देखहु ने, जमुनी के बाबू अबरी जल्दीए आ गेलखिन, कुछ बात हइ की ।")    (मपध॰12:19:46:3.1, 2)
58    घोघा (= घुग्घा; घूँघट) (छोटे बाबू भैंस के सानी-पानी दे रहला हल । खुसी में कुछ दूध कड़रू ले छोड़ते राम-सलाम कइलका । औतार सिंह बइठका के भीतर में कुट्टी काट रहला हल । उनखर भौजी नेवारी कोंच-कोंच के मशीन में ठूँस रहला हल । घोघा लमहर करके चौकठ लाँघे में तनिको देर नञ् कइलका ।)    (मपध॰12:19:41:2.18)
59    घोस (~ मारना = रट्टा मारना; to mug up)     (मपध॰12:19:53:1.33)
60    चुनौटी (कुल्ली करके दुन्हुँ चाय पीलन । उधर छोटे बाबू चुनौटी से खैनी निकाल के महीन-महीन खोंट रहला हल । मन तो अइसहीं हरियर हल ।)    (मपध॰12:19:42:1.19)
61    चोभा (~ मारना = रसदार या रेशेदार पके फल को खाने का उपक्रम करना या खाना प्रारंभ करना)      (मपध॰12:19:54:1.7)
62    छकना (= अघाना) (इधर बरतुहार सब के खूब खाय-पीए के इंतजाम कइल गेल । बरतुहार सब भी छक के पूड़ी तोड़लन ।)    (मपध॰12:19:41:2.33)
63    छमकल-हुलसल ("देखऽ ! देखऽ !! कैली कइसन छमकल-हुलसल आ रहल हे । जरूर आझ कोय नया समाचार लइलक हे !" सभे के नजर कैली के तरफ उठ जाहे ।)    (मपध॰12:19:44:2.1)
64    छलगर (~ दही) (सुबह के नास्ता भेल । फिन दुपहर के भोजन भी करावल गेल । बड़गो टेहरा में भैंस के दूध, छलगर दही, एक बोरी चूड़ा, 5 किलो गूँड़ आउ बजार से मँगा के एक टोकरी फल रिक्शा पर लाद के छोटे बाबू हाँथ जोड़ले दुन्हुँ के बिदा कइलन ।)    (मपध॰12:19:42:1.26)
65    छाहुर (~ मारना = छाँह मारना)     (मपध॰12:19:54:1.11)
66    छिछोहर (गँवई परिवेश में नारद जी अइसन जीवंत पात्रन के सामाजिक छवि अउ मजाक करइत युवा पीढ़ी, हँसी में निखेड़ी तलक परिणति, दिलफेंक नारद जी के सँवली संग छिछोहरन सन व्ववहार, मिलल उपहार के दुर्गति, मेहरारू के शक अउ ओकर पुष्टि, झिड़कन-नसीहत, नारद जी के थेथरपन, तिकड़म, चलित्तर पर घात ओगैरह गँवई यथार्थ के जीवंत दस्तावेज पढ़े-गुने जुकुत हे ।)    (मपध॰12:19:17:1.39)
67    छिटपिटाना (= छटपटाना) (काकी भी मार से छिटपिटाल कानइत-पीटइत अपन अदमी के गरियावइत घर भागलन आउ टूटल खटिया पर चारो खाना चित्त गिर करके रमधनिया के कोसे लगलन ।)    (मपध॰12:19:45:1.25)
68    छौड़गर (आर्थिक बोझ एत्ते जादे बढ़ गेल कि मंगर अप्पन जवान बेटन संग ओकरा से छुटकारा ला रोजहा कमाय खातिर पटना आ जा हे । ई बीच मंगरी बीमार पड़ल अउ इलाज ला छौड़गर होमियोपैथी डागडर गनौरी के न चाहइते भी सीला बुला लावऽ हे ।)    (मपध॰12:19:16:1.35)
69    जुत्ता-चप्पल (जुत्ता-चप्पल के जादे सौखीन नञ् हलन । घर से बाहर निकले बखत पैर के चिंता नञ् करो हलन । जुत्ता हे तभियो ठीक, नञ् हे तभियो कोय बात नञ् ।)    (मपध॰12:19:46:1.17)
70    जोड़ (= जोर; ~ मारना = पर बल देना; किसी चीज के लिए बाध्य करना; जिद्द करना)     (मपध॰12:19:54:1.13)
71    जोड़न (= जोरन) (काकी दूध में जोड़न देके कथा बाँचो लगली - "हम पहिले ही कहऽ हली, जरूर दाल में कुछ काला हे । तभिए तो कमली चार महीना से देखाइ नञ् पड़ऽ हल । जरी गो छौड़ी जेकर अभी दूध के दाँतो नय टूटल हे सेकर ई करतूत । छिः ! छिः !! कइसन ई जुग हो गेल । रामा हो रामा ।")    (मपध॰12:19:44:2.42)
72    झकास (जो एक बार ई विधेयक पास हो गेलो तउ समझो सब झकास हो गेलो ।)    (मपध॰12:19:43:3.22)
73    झटास (~ मारना = बारिस की तेज बौछार पड़ना)     (मपध॰12:19:54:1.16)
74    झबदा (~ मारना = लकड़ी आदि से जोर से वार करना)     (मपध॰12:19:54:1.17)
75    झाँटा (दे॰ झटास) (~ मारना)     (मपध॰12:19:54:1.18)
76    झार-पछोर (द्वारिका प्रसाद के लिखल अउ 'बिहान' मासिक में कुछ भाग छप्पल 'मोनामिम्मा' पूरा पढ़ला के बाद झार-पछोर के अपेक्षा पालले हे, न मालूम कब डॉ. रामनंदन एकरा पोथी रूप में छाप के पाठक के अँजुरी भरतन ?)    (मपध॰12:19:17:2.24)
77    झोंटहा (रमधनिया के घर के कोनाठा पर रोज झोंटहा पंथ के पंचायत लगऽ हे । बारह बजते-बजते कोय चरखा-रूई, कोय गेनरा-सुजनी तो कोय ऊन-काँटा लेके ऊहाँ जुट जाहे ।; ई तरह से पंचायत अब पंचायत नञ् रहल । ऊहाँ झोंटहा पंच के बीच गरगद्दह मच गेल ।)    (मपध॰12:19:44:1.2, 3.44)
78    झोंट्टम-झोंट्टी (कभी-कभी बकार निकासे पर ओकर मेहरारू ओकरे खूब फटकारऽ हे आउ दिन भर खटवास-पटवास लेके चूल्हा-चाकी के उपासले छोड़ दे हे । ईहे कारण हे कि लाख हल्ला-गुल्ला होवे या झोंट्टम-झोंट्टी, उ बेचारा कुरछल-कुँढ़ल चुपचाप रह जाहे ।)    (मपध॰12:19:44:1.19)
79    टघार (= घी, तेल आदि का रिसना)     (मपध॰12:19:54:1.26)
80    टहलना-बुलना (आसो चा दिल्ली के एगो जूट मील में काम करो हलन । सोभाव के बड़ी नेक हलन, काहे कि सड़क पर टहलते-बुलते जदि कोय परिचित उनका नजर पड़ जा हल, झट दौड़ के उनका पास जा हलन अउ गले-गले मिलो हलन ।)    (मपध॰12:19:46:1.5)
81    टहल्ला (काकी - "आउ कुछ तोहनी सबन जानऽ ह कि नञ् ? आझ ओकर बाप ओकरा पटना ले गेल हे, पटना ।"/  बटेसरी - "हाँ ! जवान बेटी के गली-गली में टहल्ला मारे ले बेछूट छोड़ देता आउ ए रोज कते पटना-दिल्ली घुमइले चलता ?")    (मपध॰12:19:44:3.19)
82    टेहरा (सुबह के नास्ता भेल । फिन दुपहर के भोजन भी करावल गेल । बड़गो टेहरा में भैंस के दूध, छलगर दही, एक बोरी चूड़ा, 5 किलो गूँड़ आउ बजार से मँगा के एक टोकरी फल रिक्शा पर लाद के छोटे बाबू हाँथ जोड़ले दुन्हुँ के बिदा कइलन ।)    (मपध॰12:19:42:1.25)
83    टोइया (~ मारना = कीचड़ या अंधेरे में टटोल कर कुछ खोजना)     (मपध॰12:19:54:1.30)
84    टोकारा (~ मारना = टोकना)     (मपध॰12:19:54:1.31)
85    ठकमुरती (= ठकमुरकी, कठमुरकी) (जी हम सब के घर जहानाबाद के नगीच एगो छोटगर गाँव रघुनाथपुर भेलइ । - अपने के आवे के परयोजन ? - जी, बरतुहारी खातिर, छोटे बाबू के बड़का बेटा औतार सिंह पर । जेतना लोग वहाँ हलन सबके ठकमुरती मार देलक । औतार सिंह 52 वसंत देखल आदमी । लिख लोढ़ा, पढ़ पत्थल, सोलह दूनी आठ ।; जइसे कोय बियाहता अपन मरद के मरे के खबर सुन के हक्का-बक्का हो जाहे, ठीक वैसहीं औतार सिंह के ठकमुरती मार देलक ।)    (मपध॰12:19:41:2.3, 42:3.5)
86    ठन-ठन (सूखल ~) (आँय रे बुड़बक्खा, गुलरिया दने पानी तीन दिन से घूरल हउ आउ तोर खेत सूखल ठन-ठन हउ । खाली फागू चा के खेता से दू गो खँड़हो काट देंहीं, बस, बीस-पच्चीस मिनट में तो दहापोरे कर देतउ ।)    (मपध॰12:19:41:1.23)
87    ठुर्री (~ मारना = लत्तर-पत्तर के विकास का रुक जाना; लता आदि में लगने वाले फलों का ठंढ के कारण विकास रुक जाना)     (मपध॰12:19:54:1.37)
88    ठौरे (= पास में ही) (नन्हकू चा एक पाँजा सनय काँख तर दाबले केतली पर चढ़ल सुतरी के ससार-ससार के समेट रहलन हल । ... ठौरे खड़ा हलन सुक्खी चा । पुछलन - की रे नन्हकूआ ! की हाल-चाल हउ ?)    (मपध॰12:19:41:1.19)
89    डंडी (~ मारना = कोंती मारना, कमतर तौलना, तौल में गड़बड़ करना)     (मपध॰12:19:55:1.2)
90    डभकना (उत्कर्ष कहानी के एगो अइसन तत्व हे जेकरा बिना पढ़कुआ के मन न भर सकऽ हे । जइसे जेठ-बैसाख में नदी के पेट पचक जा हे, आसिन-कातिक में डभक जा हे । ओइसहीं कातिक-अगहन में किसान के कोठी-कोठिला भर जा हे, सावन-भादो आते-आते खलिया जा हे ।)    (मपध॰12:19:8:2.19)
91    ढाही (~ मारना = टक्कर लेना, प्रहार करना)     (मपध॰12:19:55:1.8)
92    ढिपलिस (= डींग) (~ मारना)     (मपध॰12:19:55:1.9)
93    ढुँस्सा (दे॰ ढूँसा) (~ मारना)     (मपध॰12:19:55:1.7)
94    ढुकाना (= घुसाना) (लड़का बोलावे के बात भेल । घर में औतार बाबू सच्ची सिंह के माँगल जूता में जबरदस्ती गोड़ ढुकावे के परयास में लगल हला । भौजी उनखर जूता के फीता खोल के अंतिम सिरा तक पहुँचा देलका हल । कइसहूँ ऊ गोड़ हेलाऽ तो देलका लेकिन अँगूठा लमहर होवे के चलते दुन्हुँ जूता के हेडलाइट बनल हल ।)    (मपध॰12:19:41:2.41)
95    ढेरिआयल ('बिसेसरा' में हम एक्के गो लय पावऽ ही जे छंदोबद्ध कविता सन भास्कर हे । एहमें हठुआ मनी बिंब ढेरिआयल हे ।)    (मपध॰12:19:12:3.25)
96    तरुआ (= तलवा) (कैली के हुक्का पीयल हो गेल हल । ओकरा समाचार देल-लेल हो गेल हल । अब ओकर तरुआ में नोचनी होवे लगल ।)    (मपध॰12:19:44:3.25)
97    तातलवज (दे॰ तातलब्ज) (राधे में जब भी निष्क्रियता, आलस, अनास्था ओगैरह पलायनवादी प्रवृत्तियन के संचार होवऽ हे, रमरतिया तातलवज में ओकरा अन्याय, अनाचार से लोहा लेवे ला उकसावऽ हे ।)    (मपध॰12:19:15:3.1)
98    तोर-मोर (भर बउसाव फेर से परिवार के भगोड़न के एकत्र करे के कोरसिस करबइ । कामयाबी मिललइ त ठीक, नञ् त तोर-मोर बलइए से !)    (मपध॰12:19:4:1.21)
99    थेथरपन (गँवई परिवेश में नारद जी अइसन जीवंत पात्रन के सामाजिक छवि अउ मजाक करइत युवा पीढ़ी, हँसी में निखेड़ी तलक परिणति, दिलफेंक नारद जी के सँवली संग छिछोहरन सन व्ववहार, मिलल उपहार के दुर्गति, मेहरारू के शक अउ ओकर पुष्टि, झिड़कन-नसीहत, नारद जी के थेथरपन, तिकड़म, चलित्तर पर घात ओगैरह गँवई यथार्थ के जीवंत दस्तावेज पढ़े-गुने जुकुत हे ।)    (मपध॰12:19:17:1.42)
100    दरबर (~ मारना = तेजी से भागना)     (मपध॰12:19:55:1.19)
101    दरवज्जा (= दरवाजा) (~ लगना) (ई बात अलग हइ कि ऊ मगही में अभी भर जी चोखइबो नञ् कैलखिन हे । आउ जबसे ऊ मगही में अइलथिन हे, पईंचा लेके पादते रहलथिन हे मगही में, अप्पन कोय औकात नञ् हे उनकर - चाचा भरौंसे गोमस्तगिरी करते रहलथिन हे मगही में । धनंजय श्रोत्रिय नियन खट के देखथिन त कउची तो फटऽ हइ, जे फट के दरवज्जा लग जइतन ।)    (मपध॰12:19:5:1.31)
102    दहापोर (आँय रे बुड़बक्खा, गुलरिया दने पानी तीन दिन से घूरल हउ आउ तोर खेत सूखल ठन-ठन हउ । खाली फागू चा के खेता से दू गो खँड़हो काट देंहीं, बस, बीस-पच्चीस मिनट में तो दहापोरे कर देतउ ।)    (मपध॰12:19:41:1.25)
103    देखाय (लड़का ~) (उनखा 'लड़का' के रूप में देखे ले अइसन भीड़ लगल जे हम पहिले कहीं लड़का देखाय में नञ् देखलुँ हल । लंफ के बाती बढ़ावते कारू सिंह बोललका कि मुँह-कान देखे के हे भाय तो बढ़ियाँ से देख ल ।)    (मपध॰12:19:41:3.23)
104    धनखेत (खैनी खाके दूगो लोटा लेले खेत दने मैदान करावे ले रपरपाल जा रहला हल । बरतुहार लोटा लेके धनखेत तरफ चल गेलन ।)    (मपध॰12:19:42:1.23)
105    धोबिया (~ पाट मारना = उठाकर पटक देना)     (मपध॰12:19:55:1.24)
106    निठाहे (मगही उपन्यास रचना संख्या के दृष्टि में निठाहे कम हे मुदा गुणवत्ता के दृष्टि से कोय भी भारतीय भाषा से तनियो कमजोर नय हे ।)    (मपध॰12:19:17:3.3)
107    निनाना (घटनाक्रम भी कहानी के कई गो मोड़ बानावऽ हे जहाँ आवश्यकता के अनुरूप कहानीकार घटनाक्रम पर बइठ के साँस लेवऽ हे, कभी दउड़ऽ हे, कभी सुस्ता हे, कभी हाँफऽ हे, कभी निना जाहे ।)    (मपध॰12:19:8:2.4)
108    नुकना (= छिपना) (अड़ोस-पड़ोस के मेहरारू सब भी घोग्घा तान के, केवाड़ी तर नुक-नुक के इनका निहारथ अउ घोग्घे तर फुसफुसाथ - अजी कमली माय, देखहु ने, जमुनी के बाबू अबरी जल्दीए आ गेलखिन, कुछ बात हइ की ।")    (मपध॰12:19:46:3.1)
109    पंगा (ई कवि आउ लेखक से पंगा लेवे के नञ् हको । ई सभे बड़ी सेंटिमेंटल होवऽ हथुन ।)    (मपध॰12:19:43:2.14)
110    पईंचा (= पैंचा, उधार) (ई बात अलग हइ कि ऊ मगही में अभी भर जी चोखइबो नञ् कैलखिन हे । आउ जबसे ऊ मगही में अइलथिन हे, पईंचा लेके पादते रहलथिन हे मगही में, अप्पन कोय औकात नञ् हे उनकर - चाचा भरौंसे गोमस्तगिरी करते रहलथिन हे मगही में । धनंजय श्रोत्रिय नियन खट के देखथिन त कउची तो फटऽ हइ, जे फट के दरवज्जा लग जइतन ।)    (मपध॰12:19:5:1.29)
111    पटनमावाली (पटनमावाली के कहनाम हो कि हमरा दुन्हुँ दने मोंछ चाही - कड़ी-कड़ी आउ खड़ी-खड़ी । रजुआ के बाऊ से भिड़े लेल, मोंछलड़ौअल करे लेल आउ ई कहे लेल कि हम आझ के नारी, बताव तोरा से की बात में कम हियइ ?)    (मपध॰12:19:43:3.31)
112    पठनगर (= पठनीय, पढ़ने लायक) (पात्र अउ परिवेश के अनुरूप संवाद, प्रवाहमयी भाषा अउ सहज शिल्प के कारन ई उपन्यास पठनगर हे । कहानीपन में ऊ ऊर्जा हे, जे पाठक के न खाली बान्हऽ हे, बलुक जादुई ताकत तब तलक बनौले रखऽ हे जब तलक ई उपन्यास समाप्त न हो जाय ।)    (मपध॰12:19:17:2.11)
113    पढ़कुआ (= पढ़ाकू+'आ' प्रत्यय) (उत्कर्ष कहानी के एगो अइसन तत्व हे जेकरा बिना पढ़कुआ के मन न भर सकऽ हे । जइसे जेठ-बैसाख में नदी के पेट पचक जा हे, आसिन-कातिक में डभक जा हे । ओइसहीं कातिक-अगहन में किसान के कोठी-कोठिला भर जा हे, सावन-भादो आते-आते खलिया जा हे ।)    (मपध॰12:19:8:2.17)
114    पनबट्टा (पान के पनबट्टा खरीदल गेल आउ गट्टा के गट्टा बीड़ी खरच होवे लगल । एक से एक गप-शप चलो हल अउ बीच-बीच में कभी-कभी चाची नास्ता-पानी भेज देथ ।)    (मपध॰12:19:46:3.27)
115    पलटी (~ मारना =  गाड़ी आदि का पलट जाना)     (मपध॰12:19:55:1.29)
116    पहिलौठ (दे॰ पहिलौंठ) ('बिसेसरा' राजेंद्र कुमार 'यौधेय' के लिखल उपन्यास में प्रौढ़ साहित्य के ढेरो लच्छन मौजूद हे । ... ई मगही के पहिलौठ आंचलिक उपन्यास हे ।)    (मपध॰12:19:12:2.28)
117    पाँजा (नन्हकू चा एक पाँजा सनय काँख तर दाबले केतली पर चढ़ल सुतरी के ससार-ससार के समेट रहलन हल ।)    (मपध॰12:19:41:1.15)
118    पादना (ई बात अलग हइ कि ऊ मगही में अभी भर जी चोखइबो नञ् कैलखिन हे । आउ जबसे ऊ मगही में अइलथिन हे, पईंचा लेके पादते रहलथिन हे मगही में, अप्पन कोय औकात नञ् हे उनकर - चाचा भरौंसे गोमस्तगिरी करते रहलथिन हे मगही में । धनंजय श्रोत्रिय नियन खट के देखथिन त कउची तो फटऽ हइ, जे फट के दरवज्जा लग जइतन ।)    (मपध॰12:19:5:1.29)
119    पुटकी (~ मारना = क्षण भर में मर जाना)     (मपध॰12:19:55:1.32)
120    पुरनियाँ (3-4 मार्च के बरबीघा के श्रीकृष्ण रामरुचि महाविद्यालय में आयोजित 'वसंत महोत्सव' के शुरुआत के ठीक पहिले मगही के पुरनियाँ कवि-लेखक बैजू बाबू के बस से धक्का लग जाय से हाँथ टूट जाय के कारण उल्लास के वातावरण नञ् रह सकलै, रंग-अबीर नञ् उड़ सकलै बरबीघा के कार्यक्रम में ।)    (मपध॰12:19:4:1.6)
121    पोचाड़ा (~ मारना = दीवार में चूना आदि पोतना)     (मपध॰12:19:55:1.36)
122    फलदान (पंडित जी पतरा देखलन आउ कहलन कि आज 12 बजे दिन में फलदान के बढ़ियाँ मुहुर्त बन रहलो हे । बरतुहार न आव देखलन न ताव आउ फलदान के तैयारी करे में जुट गेलन । 10 बजे पंडित जी ई शुभ समाचार सुनइलका हल आउ दुइए घंटा के बाद फलदान हल ।)    (मपध॰12:19:41:3.32, 34, 36)
123    फुदक्का (~ मारना = फुदकना)     (मपध॰12:19:55:1.40)
124    बंडी (मुँह में एक खिल्ली पान हरदम चिबैते रहऽ हलन । धोती, कुरता पर एक मोटियाँ बंडी जरूर रखो हलन ताकि बंडी के वड़गो-बड़गो पाकिट में सरोता, कसेली, दू-चार पत्ता पान, माचिस अउ बीड़ी रखा जाय ।)    (मपध॰12:19:46:1.14, 15)
125    बजड़ा (~ मारना = पटक देना)     (मपध॰12:19:56:1.5)
126    बजारना (= बजाड़ना) (बुलकनी के आँसू देख के उनकर बुढ़ाल नस में गोस्सा से खून दौड़े लगल । ऊ छेंड़ी उसाह के काकी के पीठ पर बजारो लगल ।)    (मपध॰12:19:45:1.22)
127    बड्ड (= बहुत) (सच ईहे एगो बहाना हे 'सँवली' के पावे ला । वसंत एहमें बड्ड आसानी से सफल हो जा हे । कचहरी में 'सँवली' संग बिआह रचा ले हे ।)    (मपध॰12:19:17:1.2)
128    बरजोरी (= बलजबरी, जबरदस्ती) (अगरचे ओकर बाप ओकरा बरजोरी संबंध सूत्र में न बान्हते हल त बिसेसरा अन्यमनस्क न होत हल आउ आझ ओकर दोसर संसार रहत हल ।)    (मपध॰12:19:13:2.9)
129    बरियार (= मजबूत, शक्तिशाली) (नन्हकू चा एक पाँजा सनय काँख तर दाबले केतली पर चढ़ल सुतरी के ससार-ससार के समेट रहलन हल । दु-दु गो सनय खींच-खींच के केतली के नचा-नचा के बरियार सुतरी बनाते जा रहलन हल ।; भला बतवल जाय कि केकरो कमजोड़ कह-कह के ओकर ओजूद तू समाज में बरियार बना सको हे ? अरे, ई जमाना हे नारी के, ई जमाना हे नारी सशक्तीकरण के ।)    (मपध॰12:19:41:1.18, 43:2.5)
130    बलगर (= बलिष्ठ, बलशाली, जोरदार) (कथा-भाषा तखने के कचहरी में चलल ऊ मगही हे जेकरा पर उर्दू के प्रभाव जादे हे । न्याय-व्यवस्था से संबद्ध ई रचना में पात्र भी वकील, मुख्तार, एस.डी.ओ. जइसन बुधगर वर्ग हे, जिनखर भाषा में उर्दू आउ अंगरेजी के बलगर प्रयोग भी प्रतिष्ठा के ओजह बनऽ हल । ई लेल ई रचना के भाषा आम पाठक ला दुरूह लौकऽ हे, मुदा तद्युगीन पाठकन ला ई बोधगर हल ।)    (मपध॰12:19:12:1.37)
131    बुड़बक्खा (= बुड़बकहा, बुड़बक, मूर्ख) (आँय रे बुड़बक्खा, गुलरिया दने पानी तीन दिन से घूरल हउ आउ तोर खेत सूखल ठन-ठन हउ । खाली फागू चा के खेता से दू गो खँड़हो काट देंहीं, बस, बीस-पच्चीस मिनट में तो दहापोरे कर देतउ ।)    (मपध॰12:19:41:1.22)
132    बेसाहल (~ लड़का)     (मपध॰12:19:41:1.0)
133    बोताम (= बटन) (उधारे के पैंट भी पेन्हले हला औतार बाबू । जइसहीं ऊ कमर के बोताम आउ हुक लगावे के कोसिस कइलका कि बोताम टूट के नाली में जाके उनका चिढ़ा रहल हल ।)    (मपध॰12:19:41:3.6, 7)
134    बोधगर (कथा-भाषा तखने के कचहरी में चलल ऊ मगही हे जेकरा पर उर्दू के प्रभाव जादे हे । न्याय-व्यवस्था से संबद्ध ई रचना में पात्र भी वकील, मुख्तार, एस.डी.ओ. जइसन बुधगर वर्ग हे, जिनखर भाषा में उर्दू आउ अंगरेजी के बलगर प्रयोग भी प्रतिष्ठा के ओजह बनऽ हल । ई लेल ई रचना के भाषा आम पाठक ला दुरूह लौकऽ हे, मुदा तद्युगीन पाठकन ला ई बोधगर हल ।)    (मपध॰12:19:12:1.41)
135    भरौंसे (ई बात अलग हइ कि ऊ मगही में अभी भर जी चोखइबो नञ् कैलखिन हे । आउ जबसे ऊ मगही में अइलथिन हे, पईंचा लेके पादते रहलथिन हे मगही में, अप्पन कोय औकात नञ् हे उनकर - चाचा भरौंसे गोमस्तगिरी करते रहलथिन हे मगही में । धनंजय श्रोत्रिय नियन खट के देखथिन त कउची तो फटऽ हइ, जे फट के दरवज्जा लग जइतन ।)    (मपध॰12:19:5:1.30)
136    भागसाली (= भाग्यशाली) (जमुनी बेटी के बिआह सधारन खाता-पीता परिवार में करके अप्पन जिम्मेवारी से मुक्त आसो चा अपना के बड़ भागसाली मानो हलन । खेत-पथार भी थोड़े-बहुत हल, जेकरा से अनाज खरीदे नञ् पड़ो हल ।)    (मपध॰12:19:46:1.32)
137    मनीदारी (अपना दुआरी पर पहुँचतहीं रघुआ भेंटाइल । रघु हमरा हीं मनीदारी करऽ हे । साथे-साथ हमर गोरू-जानवर भी देखऽ हे ।)    (मपध॰12:19:51:2.15)
138    मर-मरदाना (कैली - "कि कहियो काकी ! अनरथ हो गेलइ अनरथ ।" फिन कैली चुप होके एने-ओने देखे लगल । कोय मर-मरदाना तो नञ् सुन रहल हे । सभे अप्पन-अप्पन कान कैली के मुँह के पास सटा देलक ।)    (मपध॰12:19:44:2.16)
139    महीन (कुल्ली करके दुन्हुँ चाय पीलन । उधर छोटे बाबू चुनौटी से खैनी निकाल के महीन-महीन खोंट रहला हल । मन तो अइसहीं हरियर हल ।)    (मपध॰12:19:42:1.19)
140    माट (~ मारना = चावल खरीद के समय चावल में मिले कुंडे {कुंडा = चावल की बारी भूसी आदि}के एवज में व्यापारी द्वारा चावल की अनुमानित मात्रा का निर्धारण करना)     (मपध॰12:19:56:1.27)
141    मुड़िआ (~ मारना)     (मपध॰12:19:56:1.32)
142    मुरय (= मूली) (बरतुहार कहलका कि इहाँ से बजार तीन कोस हे, से फल लावे में तो मुहुर्ते निकल जात । अइसन करऽ छोटे बाबू कि एतबर गो गाँव हे, केकरो बगीचा या घरदुआरी से अमरूद, पपीता, मुरय ई सब तो मिलिए जइतो । बरतुहार के बात में दम हल । जने-तने से छोटे बाबू दू गो मुरय, तीन गो अमरूद आउ एगो अधपकल पपीता खोज के अपन बेटा के फलदान ले जुगाड़ कइलन ।)    (मपध॰12:19:42:1.1, 3)
143    मूठ (~ मारना = हस्तमैथुन करना)     (मपध॰12:19:56:1.35)
144    मूरी (= मूड़ी; सिर) (कैली धीरे से काकी के कान में कुछ फुसफुसाल । काकी मूरी हिलावत त मुसकुराय लगली ।)    (मपध॰12:19:44:2.31)
145    मैदान ( खैनी खाके दूगो लोटा लेले खेत दने मैदान करावे ले रपरपाल जा रहला हल । बरतुहार लोटा लेके धनखेत तरफ चल गेलन ।)    (मपध॰12:19:42:1.21)
146    मोंछलड़ौअल (पटनमावाली के कहनाम हो कि हमरा दुन्हुँ दने मोंछ चाही - कड़ी-कड़ी आउ खड़ी-खड़ी । रजुआ के बाऊ से भिड़े लेल, मोंछलड़ौअल करे लेल आउ ई कहे लेल कि हम आझ के नारी, बताव तोरा से की बात में कम हियइ ?)    (मपध॰12:19:43:3.34)
147    रतवाही ('बिसेसरा' में मुसहर संस्कृति के एगो अलगे छहँकी मिले हे । ओहमें ऊँचगर जाति के मारफत लगबहिए रतवाही स्कूल खोलइत रहे के बहाने ऊ संस्कृति के जड़हीन करे के, जे राजनीतिक षड्यंत्र चले हे ऊ ओकरा नष्ट करे के अपेक्षा खुद के ही नष्ट-भ्रष्ट कर दे हे ।)    (मपध॰12:19:13:3.15)
148    रबसना (हम तो पहिले ही कमली के एक दिन बड़का डोभा पर दिनेसवा के साथ रबसइत देखलूँ हल । तखनिएँ हम समझलूँ, इ छौंड़ी के लच्छन ठीक नञ् हे ।)    (मपध॰12:19:44:3.11)
149    रमायन (= रामायण) (कत्ते बार ऊ तुलसीदास जी के रमायन पढ़ गेला हल । अभियो कुछ देर रमायन बाँचिए के सुत्तो हला । उनकर दिमाग में 'चतुर सोई जो पर धन हारा' पंक्ति बार-बार अपच बन के हूल मारे लगल ।)    (मपध॰12:19:47:1.3, 4)
150    रोजहा (डॉ. श्रीकांत शास्त्री के लिखल 'गोदना' एगो सामाजिक उपन्यास हे, जेहमें गाँव आउ नगर दुन्नुँ के कथा अंकित हे । ... आर्थिक बोझ एत्ते जादे बढ़ गेल कि मंगर अप्पन जवान बेटन संग ओकरा से छुटकारा ला रोजहा कमाय खातिर पटना आ जा हे ।)    (मपध॰12:19:16:1.33)
151    लगबहिए ('बिसेसरा' में मुसहर संस्कृति के एगो अलगे छहँकी मिले हे । ओहमें ऊँचगर जाति के मारफत लगबहिए रतवाही स्कूल खोलइत रहे के बहाने ऊ संस्कृति के जड़हीन करे के, जे राजनीतिक षड्यंत्र चले हे ऊ ओकरा नष्ट करे के अपेक्षा खुद के ही नष्ट-भ्रष्ट कर दे हे ।)    (मपध॰12:19:13:3.15)
152    लफुआ (अब अगर आज के नारी जीन्स पेन्ह के रोड पर कमर लचकइतइ तउ लफुअन तो गइबे करतइ - तनी स जीन्स ढीला करऽ ।)    (मपध॰12:19:43:3.15)
153    लफुआगिरी (हमरा लगित हे कि इ स्वामी जी के हम पहचानइत ही । जहाँ तक हमरा याद हे, इ मिथिलेसवा हे, रमेश बाबू के भाई । एकरा त कुछ दिन हमहूँ संस्कृत पढ़ौले ही । एकर लफुआगिरी से ऊब के रमेश बाबू एकरा घर से निकाल देलन हल । उ मिथिलेसवा आज एतना बड़का वक्ता हो गेल हे ।)    (मपध॰12:19:49:3.8)
154    लुरगर-बुधगर (सब्भे अफसर अउ लुरगर-बुधगर नाटक देखे ला जुमऽ हथ । नाटक सुखलाल के खुदगर्ज जीवन आउ करामात के खोलइत चलऽ हे आउ आखिर में सामलाल रायबहादुर के जगह 'फूल बहादुर' बन जा हे ।)    (मपध॰12:19:12:1.10)
155    सढ़ुआइन (बाजार से रोज मिठाई अउ मछली आवे लगल । कुसल गिरथैनी चाची खूब मसाला-तेल देके बनावे लगलन । दुन्हूँ साढ़ू एक साथ बैठ के खाथ अउ सढ़ुआइन लगी भी केन में ले जाथ ।)    (मपध॰12:19:47:1.26)
156    सढ़ुआरे (जोड़ते-जोड़ते उनका से सढ़ुआरे के रिश्ता भंजयलका । आसो चा ई सुन के बड़ी चौंकला काहे कि ऊ जानो हला कि ई धूर्त आदमी हथ, इनका साथ दोस्ती ठीक नञ् हे । आसो चा पुछलका - "हमर-तोर बिआह एक घर में नञ्, एक गाँव में नञ्, फेनु सढ़ुआरे कैसे ?" ई बोलला - "जहिना तोहर बिआह हल तहिने हमरो बिआह हल । तोहरो गाँव से पूरब, हमरो गाँव से पूरब । फिन सढ़ुआरे नञ् कैसे ? आसो चा उत्तर सुन के हार मान गेला । आउ तहिना से सढ़ुआरे के गाँठ मजबूती से बंध गेल ।)    (मपध॰12:19:47:1.9, 14, 17, 19)
157    सनय (= सन) (नन्हकू चा एक पाँजा सनय काँख तर दाबले केतली पर चढ़ल सुतरी के ससार-ससार के समेट रहलन हल । दु-दु गो सनय खींच-खींच के केतली के नचा-नचा के बरियार सुतरी बनाते जा रहलन हल ।)    (मपध॰12:19:41:1.15, 17)
158    सनेस (= सन्देश) (किसान भूख, गरीबी, बेबसी, लाचारी, कुंठा, संत्रास, बेरोजगारी, महँगाई से बिलबिला रहल हे, आत्महत्या कर रहल हे आउ हम प्रेमी-प्रेमिका के कहानी गढ़के लैला-मजनूँ, हीर-राँझा, जुलियट-रोमियो. गोपी-कृष्ण के सनेस सुनावल चाहम तो भईंस के आगे बीन बजावे ठारे भईंस पघुराय वाला हो जायत ।)    (मपध॰12:19:8:3.4)
159    सपक्का (~ मारना = बेंत या बाँस की पतली छड़ी से आघात करना)     (मपध॰12:19:57:1.9)
160    ससुरारी (हमर बेटियो ससुरारी से जग (यज्ञ) देखे खातिर आएल हे । जग में फेरी देवे के बड़ा महातम सुनऽ ही मालिक ।)    (मपध॰12:19:51:3.1)
161    साढ़ू (बाजार से रोज मिठाई अउ मछली आवे लगल । कुसल गिरथैनी चाची खूब मसाला-तेल देके बनावे लगलन । दुन्हूँ साढ़ू एक साथ बैठ के खाथ अउ सढ़ुआइन लगी भी केन में ले जाथ ।)    (मपध॰12:19:47:1.25)
162    सिलाय (= सिलाई) (~ मारना = सिलाई करना)     (मपध॰12:19:57:1.12)
163    सीधगर (सहज अउ सीधगर सोभाव के सीला गनौरी के हिरदा में भरल कालिमा के ठीक से नञ् समझऽ हे आउ फतुहा ओकरा संग मेला घुमे चल जा हे ।)    (मपध॰12:19:16:2.6)
164    सुतरी (= सन या पाट की रस्सी) (नन्हकू चा एक पाँजा सनय काँख तर दाबले केतली पर चढ़ल सुतरी के ससार-ससार के समेट रहलन हल । दु-दु गो सनय खींच-खींच के केतली के नचा-नचा के बरियार सुतरी बनाते जा रहलन हल ।)    (मपध॰12:19:41:1.16, 18)
165    सुतार (~ लगना) (फगुनहट खतम होतहीं 'वसंत अंक' अपने के हाँथ में सौंपते थोड़े-थाड़ गुरगुद्दी नियन बुझा रहलै हे हमरा । अइसन नञ् हइ कि फगुआ में अइसन सुतार लगलै कि मन गदगरल हइ ।)    (मपध॰12:19:4:1.2)
166    हमर-तोर (जोड़ते-जोड़ते उनका से सढ़ुआरे के रिश्ता भंजयलका । आसो चा ई सुन के बड़ी चौंकला काहे कि ऊ जानो हला कि ई धूर्त आदमी हथ, इनका साथ दोस्ती ठीक नञ् हे । आसो चा पुछलका - "हमर-तोर बिआह एक घर में नञ्, एक गाँव में नञ्, फेनु सढ़ुआरे कैसे ?")    (मपध॰12:19:47:1.13)
167    हूल (~ मारना = उबकाई आना)     (मपध॰12:19:57:1.25)
168    हेलाना (= घुसाना) (लड़का बोलावे के बात भेल । घर में औतार बाबू सच्ची सिंह के माँगल जूता में जबरदस्ती गोड़ ढुकावे के परयास में लगल हला । भौजी उनखर जूता के फीता खोल के अंतिम सिरा तक पहुँचा देलका हल । कइसहूँ ऊ गोड़ हेलाऽ तो देलका लेकिन अँगूठा लमहर होवे के चलते दुन्हुँ जूता के हेडलाइट बनल हल ।)    (मपध॰12:19:41:3.3)