विजेट आपके ब्लॉग पर

Friday, September 16, 2016

रूसी उपन्यास "आझकल के हीरो" ; भाग-2 ; 2. राजकुमारी मेरी - अध्याय-2



रूसी उपन्यास – “आझकल के हीरो”
भाग-2
2. राजकुमारी मेरी - अध्याय-2

13 मई

आझ सुबह डाक्टर हमरा हीं अइलथिन । उनकर नाम हइ वेर्नर, लेकिन ऊ रूसी हथिन । एकरा में अचरज के की बात हइ ? हम एगो इवानोव के जानऽ हलिअइ, जे जर्मन हलइ ।

कइएक कारण से वेर्नर एगो विलक्षण व्यक्ति हथिन । ऊ संशयवादी आउ भौतिकवादी हथिन, लगभग सब्भे डाक्टर नियन, आउ साथे-साथ एगो कवि हथिन, आउ ई बात हम मजाक में नयँ कहऽ हिअइ – कवि, काम के मामले में हमेशे आउ उक्ति (utterings) में अकसर, हलाँकि अपन जिनगी में ऊ दू लाइन कविता नयँ लिखलथिन। ऊ मानव हृदय के सब सजीव तार (live strings) के अध्ययन कइलथिन हँ, जइसे कि एगो मुरदा के नस के अध्ययन कइल जा हइ, लेकिन कभियो ऊ अपन ज्ञान के लाभ नयँ उठा पइलथिन, जइसे कि कभी-कभी शरीर-रचना के उत्तम जनकारी रक्खे वला (excellent anatomist) बोखार के इलाज नयँ कर पावऽ हइ ! साधारणतः वेर्नर मने मन अपन रोगियन के मजाक उड़ावऽ हलथिन; लेकिन एक तुरी हम देखलिअइ, कि एगो मर रहल सैनिक लगी लोर ढार रहलथिन हल ... ऊ निर्धन हलथिन, करोड़पति बन्ने के सपना देखऽ हलथिन, लेकिन पैसा लगी जरिक्को प्रयास नयँ करऽ हलथिन । ऊ एक तुरी हमरा बतइलथिन, कि ऊ मित्र के अपेक्षा शत्रु पर कहीं उपकार करथिन, काहेकि एकर मतलब होतइ अपन उपकार के बेचना, जबकि प्रतिद्वंद्वी के उपकार के अनुपात में खाली घृणा प्रबल होतइ । उनकर जीभ कटु हलइ – उनकर चुटकुला के छद्मवेष में कइएक उदार व्यक्ति नीच मूर्ख के रूप में मशहूर हो गेले हल । उनकर प्रतिद्वंद्वी, द्वेषी स्पा डाक्टर सब, एगो अफवाह फैला देते गेलइ, कि ऊ अपन रोगी लोग के मानूँ व्यंग्य चित्र (कार्टून) बनावऽ हइ - रोगी लोग भड़क गेते गेलइ, लगभग सब लोग ओकरा से इलाज करावे से इनकार कइलकइ । ओकर मित्र सब, मतलब वास्तव में काकेशिया में सरकारी नौकरी करे वला भद्र लोग, उनकर गिर रहल प्रतिष्ठा के फेर से स्थापित करे के व्यर्थ प्रयास करते गेलइ ।

उनकर बाह्याकृति ओइसन लोग नियन हलइ, जे प्रथमदृष्ट्या अप्रिय छाप छोड़ऽ हइ, लेकिन जे बाद में लोग के पसीन पड़ऽ हइ, जब आँख अनियमित नाक-नक्शा में अनुभवी आउ उच्च आत्मा के चिह्न पढ़ना सीख ले हइ । अइसन उदाहरण होवऽ हलइ, कि औरतियन अइसन लोग पर पागलपन के हद तक प्यार में पड़ जा हलइ आउ ओकन्हीं के कुरूपता के, एन्दीमियोन (Endymions) के सबसे ताजा आउ गुलाबी सौन्दर्य के तुलना में कहीं अधिक पसीन करते हल । औरतियन के साथ ई न्याय करहीं के चाही कि ओकन्हीं के आत्मिक सौंदर्य के सहज-बोध होवऽ हइ । शायद ओहे से वेर्नर जइसन लोग औरतियन के एतना जादे भावावेश में प्यार करऽ हइ ।       

वेर्नर कद में नटगर, दुब्बर-पातर आउ बुतरू नियन दुर्बल हलथिन । उनकर एक गोड़ दोसरा के अपेक्षा छोटगर हलइ, जइसन कि बायरोन (Byron) के हलइ; शरीर के तुलना में उनकर सिर बड़गो लगऽ हलइ । ऊ अपन सिर के बाल एतना छोटगर कटवावऽ हलथिन कि कंघी करे के जरूरते नयँ रहऽ हलइ, आउ अइसे कइला से उनकर प्रकट होल खोपड़ी के अनियमितता, विरोधाभासी झुकाव (inclinations) के विचित्र बनावट से एगो कपाल-विज्ञानी (phrenologist) के अचंभित कर देते हल । उनकर छोटगर-छोटगर, हमेशे बेचैन, कार आँख, मानूँ अपने के विचार के टोह लगावे के प्रयास करऽ हलइ । उनकर पोशाक में अभिरुचि आउ स्वच्छता दृष्टिगोचर होवऽ हलइ । उनकर दुब्बर नसगर आउ छोटगर हाथ हलका पीयर दस्ताना में साफ देखाय दे हलइ । उनकर फ्रॉक-कोट, टाई, आउ वास्कट (waistcoat) हमेशे कार रंग के रहऽ हलइ । नवयुवक सब उनका मेफ़िस्तोफ़ेल (Mephistopheles - जर्मन लोककथा में एगो राक्षस) नाम से पुकारऽ हलइ । ऊ अइसन अभिनय करऽ हलथिन, मानूँ उनका अइसन उपनाम से गोस्सा बरऽ हइ, लेकिन वास्तव में एकरा से उनकर स्वाभिमान के संतुष्टि मिल्लऽ हलइ । हमन्हीं दुन्नु एक दोसरा के जल्दीए समझ गेते गेलिअइ आउ दोस्त बन गेलिअइ, काहेकि हम मित्रता के मामले में सक्षम नयँ हिअइ - दू गो दोस्त के बीच एगो हमेशे दोसरा के गुलाम होवऽ हइ, हलाँकि अकसर ओकन्हीं में से एक्को गो ई बात के कबूल नयँ करऽ हइ । हम गुलाम नयँ हो सकऽ हिअइ, आउ अइसन हालत में आदेश देना - बहुत कष्ट के काम हइ, काहेकि एकर साथ-साथ छल के सहारा लेवे पड़ऽ हइ; आउ एकरा अलावे हमरा पास नौकर-चाकर आउ पैसा हइ ! त अइकी हमन्हीं में अइसे दोस्ती होलइ - वेर्नर से हमर भेंट शहर एस- (S—) में होलइ, नवयुवक लोग के बहुसंख्यक आउ शोर भरल मंडली के बीच । शाम के अंत तक बातचीत दार्शनिक आउ अध्यात्म के दिशा में मोड़ लेलकइ । दृढ़ विश्वास के बारे चर्चा हो रहले हल । हरेक कोय के एकरा नयँ तो ओकरा में विश्वास हलइ ।

"जाहाँ तक हमरा से संबंध हइ, त हमरा एक्के बात में विश्वास हइ ...", डाक्टर बोलला ।
"कउची में ?" हम पुछलिअइ, अइसन व्यक्ति के विचार जाने लगी, जे अभी तक चुप हलइ ।
"ई बात में", ऊ उत्तर देलका, "कि देर चाहे सबेर, एगो सुंदर सुबह के हम मर जइबइ ।"
"हम अपने से जादे धनगर हिअइ", हम कहलिअइ, "एकर अलावे हमरा आउ एगो विश्वास हइ - ठीक ई, कि हमरा एगो बहुत खराब शाम के पैदा होवे के दुर्भाग्य होल ।"

सब्भे के लगलइ, कि हमन्हीं बकवास कर रहलिए ह, लेकिन वास्तव में, ओकन्हीं बीच कोय भी एकरा से आउ अधिक बुधगर बात नयँ कहलकइ । ई पल से भीड़ में हमन्हीं एक दोसरा के पछनलिअइ । हमन्हीं अकसर मिलते जा हलिअइ आउ दुन्नु बहुत गंभीरतापूर्वक भावात्मक विषय (abstract subjects) पर चर्चा करते जा हलिअइ, जब तक कि दुन्नु के ई आभास नयँ होलइ, कि हमन्हीं एक दोसरा से छल कर रहलिए ह । तब एक दोसरा के आँख में आँख डालके सार्थक रूप से देखके, जइसन कि, सिसेरो के अनुसार, रोमन शगुनियाँ लोग (augurs) करते जा हलइ, हमन्हीं ठठाके हँस्से लगलिअइ, आउ मन भर दिल खोलके हँस लेला के बाद, अपन शाम से पूरा संतुष्ट होल एक दोसरा से अलगे हो जा हलिअइ ।

हम सोफा पर पड़ल हलिअइ, अपन नजर छत दने कइले आउ हाथ सिर के निच्चे एक दोसरा से जकड़ले, तब वेर्नर हमर कमरा में प्रवेश कइलका । ऊ आराम कुरसी पर बैठ गेला, अपन छड़ी एगो कोना में धर देलका, उबासी लेलका आउ बोलला कि बहरसी झरक चल रहले ह । हम जवाब देलिअइ, कि हम मक्खी से बेचैन हकूँ - आउ हमन्हीं दुन्नु चुप हो गेलिअइ ।

"देखथिन, हमर प्रिय डाक्टर", हम कहलिअइ, "कि बिन मूर्ख लोग के दुनियाँ में बहुत बोरियत होते हल ! ... देखथिन, अइकी हमन्हीं दू गो बुद्धिमान लोग हिअइ । हमन्हीं पहिलहीं से जानऽ हिअइ, कि दुन्नु अनंत काल तक सब कुछ के बारे बहस कर सकऽ हिअइ, आउ ओहे से बहस नयँ करते जा हिअइ । हमन्हीं एक दोसरा के लगभग सब्भे गुप्त विचार जानऽ हिअइ । एक्के शब्द हमन्हीं लगी समुच्चे कहानी हइ । तीन तह के खोल (छिलका, shell) से हमन्हीं के अपन हरेक भावना के अन्न देखाय दे हइ । शोकजनक बात हमन्हीं के हास्यास्पद लगऽ हइ, हास्यास्पद बात दुखद लगऽ हइ, आउ सामान्यतः, वास्तव में, सब कुछ के मामले में हमन्हीं भावशून्य होवऽ हिअइ, खुद के छोड़के । ओहे से, भावना आउ विचार के आदान-प्रदान हमन्हीं बीच नयँ हो सकऽ हइ - एक दोसरा के बारे हमन्हीं सब कुछ जानऽ हिअइ, आउ कुछ जादे जाने लगी नयँ चाहऽ हिअइ । एक्के उपाय रह जा हइ - समाचार सुनाना । कइसनो समाचार कहथिन ।
लमगर भाषण से थक्कल हम आँख मून लेलिअइ आउ उबासी लेलिअइ ...
ऊ थोड़े देर सोचला के बाद उत्तर देलका - "अपने के बकवास में लेकिन एगो विचार हइ ।"
"दू गो !" हम उत्तर देलिअइ ।
"हमरा एगो बताथिन, हम अपने के दोसरका बता देबइ ।"
"ठीक हइ, शुरू करथिन !" हम कहलिअइ, छत दने निहारना जारी रखते आउ मने मन मुसकइते ।
"अपने के मन कर रहले ह - स्पा में आवल लोग में से केकरो बारे विस्तार से जाने के, आउ हमरा पहिलहीं से अंदाज हइ कि अपने के केकरा बारे फिकिर हइ, काहेकि अपने के बारे हुआँ परी पहिलहीं पूछताछ कइल गेले ह ।"
"डाक्टर ! हमन्हीं के पक्का कुछ नयँ बतियाय के चाही - हमन्हीं एक दोसर के मन पढ़ लेते जा हिअइ ।"
"अब दोसरका ..."
"दोसरका विचार अइकी ई हइ - हमरा मन कइलकइ कि हम अपने के कुछ सुनावे लगी बाध्य करिअइ; पहिला, काहेकि सुनना कम थकाऊ होवऽ हइ; दोसरा, श्रोता के राज के बात बतावे नयँ पड़ऽ हइ; तेसरा, दोसर के गुप्त बात जान ले सकऽ हइ; चौठा, काहेकि अपने नियन बुद्धिमान लोग, वक्ता के अपेक्षा श्रोता लोग के जादे पसीन करते जा हथिन । अब काम के बात पर आल जाय - अपने के राजकुमारी लिगोव्सकाया हमरा बारे की कहलथिन ?"
"की अपने के पक्का विश्वास हइ, कि ई बड़की राजकुमारी हलथिन ... छोटकी नयँ ? ..."
"बिलकुल पक्का ।"
"काहे ?"
"काहेकि छोटकी राजकुमारी (अर्थात् मेरी) ग्रुशनित्स्की के बारे पूछ रहलथिन हल ।"
"अपने के सूझ-बूझ के बड़गो प्रतिभा हइ । छोटकी राजकुमारी कहलथिन, कि उनका पक्का विश्वास हइ, कि फौजी ओवरकोट में ई नवयुवक के सैनिक के रैंक में पदावनति, द्वंद्वयुद्ध (duel) के कारण होले होत ..."
"हमरा आशा हइ, कि अपने उनका अइसन सुखद भ्रम में छोड़ देलथिन ..."
"जाहिर हइ ।"
"(कथानक के) शुरुआत हइ !" हम हर्षातिरेक में चिल्ला उठलिअइ, "ई कॉमेडी के उपसंहार हमन्हीं के मामला (concern) होतइ । साफ हइ कि किस्मत ई बात के ध्यान रख रहले ह कि हम बोर नयँ होइअइ ।"
"हमरा आशंका हइ", डाक्टर बोलला, "कि बेचारा ग्रुशनित्स्की अपने के शिकार बनतइ ..."
"आगू बोलथिन, डाक्टर ..."
"बड़की राजकुमारी कहलथिन, कि अपने के चेहरा उनका परिचित हइ । हम नोटिस कइलिअइ, कि शायद ऊ अपने से पितिरबुर्ग में भेंटलथिन हल, कहीं तो उच्च समाज में ... हम अपने के नाम बतइलिअइ ... ई उनका मालूम हलइ । लगऽ हइ, अपने के कहानी हुआँ परी बहुत धूम मचइलके हल ... बड़की राजकुमारी अपने के अभियान के बारे बतावे लगलथिन, उच्च समाज में पसरल अफवाह पर शायद अपन टीका-टिप्पणी जोड़ते । उनकर बेटी उत्सुकतापूर्वक सुन रहलथिन हल । उनकर कल्पना में अपने नयका फैशन के उपन्यास के हीरो बन गेलथिन हल ... हम बड़की राजकुमारी के बात के  प्रत्याख्यान (खंडन) नयँ कइलिअइ, हलाँकि हम जानऽ हलिअइ, कि ऊ बकवास कर रहलथिन हँ ।"
"सुयोग्य मित्र !" हम उनका दने अपन हाथ बढ़इते कहलिअइ ।
डाक्टर एकरा प्रेम के साथ दबइलथिन आउ अपन बात जारी रखलथिन -
"अगर चाहथिन, त हम अपने के परिचय करावऽ हिअइ ..."
"हे भगमान !" हम अपन हाथ उपरे उठइते कहलिअइ, "की हीरो लोग के परिचित करावल जा हइ ? ओकन्हीं के आउ कोय दोसरा तरह से परिचित नयँ करावल जा हइ, बल्कि वास्तविक मृत्यु से अपन प्रेयसी के बचइते परिचय होवऽ हइ ..."
"त की अपने छोटकी राजकुमारी के पीछू-पीछू चक्कर लगावे (लाइन मारे) लगी चाहऽ हथिन ? ..."
"एकर विपरीत, बिलकुल एकर विपरीत ! ... डाक्टर, अंत में हमर विजय होवऽ हइ - अपने हमरा नयँ समझऽ हथिन ! ... ई बात से, बल्कि, हमरा दुख होवऽ हइ, डाक्टर", मिनट भर मौन के बाद हम बात जारी रखलिअइ, "हम कभियो अपन रहस्य के उजागर नयँ करऽ हिअइ, बल्कि हम भयंकर रूप से पसीन करऽ हिअइ, कि ओकर लोग अंदाज लगावइ, काहेकि अइसन हालत में हम जरूरत पड़ला पर हमेशे ई बात के अस्वीकार कर सकऽ हइ । लेकिन माँ आउ बेटी के बारे अपने के हमरा वर्णन करे के चाही । उनकन्हीं कइसन लोग हथिन ?"
"सर्वप्रथम, बड़की राजकुमारी - पैतालीस साल के महिला हथिन", डाक्टर उत्तर देलथिन, "उनकर पाचनशक्ति तो उत्तम हइ, लेकिन उनकर खून में खराबी हइ; गाल पर लाल धब्बा हइ । अपन आधा जिनगी ऊ मास्को में बितइलथिन हँ आउ हियाँ निष्क्रिय जीवन जीए के चलते मोटाऽ गेलथिन हँ । उनका चटकदार खिस्सा पसीन हइ आउ खुद्दे कभी-कभी अशिष्ट बात करऽ हथिन, जब उनकर बेटी घर में नयँ होवऽ हथिन । ऊ हमरा एलान कइलथिन, कि उनकर बेटी पंडुक नियन निर्दोष हथिन । हमरा ई बात से की लेना-देना हलइ ? ... हम उनका उत्तर देवे वला हलिअइ, कि ऊ निश्चिंत रहथिन, कि हम ई बात केकरो नयँ बतइबइ ! बड़की राजकुमारी वाता के इलाज करावऽ हथिन, आउ उनकर बेटी, भगमान जाने, कउची के । हम दुन्नु के दिन में दू तुरी गंधकयुक्त पानी (oxysulphuric water) पिए के आउ सप्ताह में दू तुरी तनूकृत (diluted) स्नान करे के सलाह देलिअइ । बड़की राजकुमारी, लगऽ हइ, आदेश देवे के आदी नयँ हथिन । उनका अपन बेटी के बुद्धि आउ ज्ञान के प्रति आदर हइ, जे अंगरेजी में बायरोन के पढ़लथिन हँ आउ बीजगणित जानऽ हथिन । मास्को में, लगऽ हइ, नवयुवती लोग उच्च शिक्षा के राह पर चल पड़ते गेलथिन हँ, आउ निम्मन कर रहते गेलथिन हँ, सचमुच ! हमन्हीं के पुरुष लोग साधारणतः ओतना शिष्ट नयँ होते जा हथिन, कि उनकन्हीं साथ प्रेम प्रदर्शन एगो बुधगर स्त्री के असह्य होतइ । बड़की राजकुमारी के नवयुवक लोग बहुत पसीन हइ । छोटकी ओकन्हीं के कुछ घृणा के दृष्टि से देखऽ हथिन - मास्को के आदत ! मास्को में उनकन्हीं के खाली चालीस साल के कुशाग्र बुद्धि वला लोग से मन भरऽ हइ ।

"आउ अपने कभी मास्को गेलथिन हँ, डाक्टर ?"
"हाँ, हम हुआँ कुछ प्रैक्टिस कइलिए हल ।"
"आगू बोलथिन ।"
"लेकिन हम तो, लगऽ हइ, सब कुछ कह चुकलिए ह ... हाँ ! अइकी आउ कुछ हइ - छोटकी राजकुमारी के भावना, अभिरुचि (शौक), आदि के बारे विचार-विमर्श करना पसीन हइ ... जाड़ा में एक तुरी ऊ पितिरबुर्ग गेलथिन हल, आउ ऊ उनका नयँ पसीन पड़ले हल, खास करके हुआँ के समाज - शायद, उनका भावहीन रूप से स्वागत कइल गेले हल ।"
"अपने उनकन्हीं के घर पर आझ केकरो नयँ देखलथिन ?"
"एकर विपरीत, एगो सहायक (adjutant) हलइ, तनावग्रस्त गार्ड आउ नावा-नावा आवल में से एगो महिला, जे उनकर पति के एगो रिश्तेदार हलइ, बहुत सुंदर, लेकिन लगऽ हलइ, बहुत रोगियाही ...  की अपने के ओकरा से कुआँ भिर भेंट नयँ होले हल ? मँझोला कद के, सुनहरा केश, सुंदर नाक-नक्शा, चेहरा के रंग क्षयग्रस्त, आउ दहिना गाल पर कार तिल । ओकर चेहरा अपन अभिव्यक्तिशीलता से हमरा अचंभित कर देलकइ।"
"तिल !" दाँत के बीच से हम बड़बड़इलइ । "वास्तव में ?"
डाक्टर हमरा दने तकलथिन आउ सोल्लास कहलथिन, हमर छाती पर अपन हाथ रखके - "ऊ अपने के परिचित हथिन ! ..."

हमर छाती सामान्य से कहीं अधिक जोर से धड़धड़ा रहल हल ।
"अब अपने के उल्लास मनावे के पारी हइ !" हम कहलिअइ, "खाली हम अपने पर भरोसा करऽ हिअइ, अपने हमरा से विश्वासघात नयँ करथिन । हम ओकरा अभी तक नयँ देखलिए ह, लेकिन हमरा पक्का विश्वास हइ, कि अपने के बतावल नाक-नक्शा वली एक औरत के पछानऽ हिअइ, जेकरा हम पहिले कभी प्यार करऽ हलिअइ ... लेकिन ओकरा हमरा बारे एक्को शब्द नयँ बोलथिन । अगर ऊ पुच्छइ, त हमरा बारे खराब रिपोर्ट देथिन ।"
"जइसन अपने के मरजी !" कन्हा उचकइते वेर्नर कहलका ।
जब हम चल गेलिअइ, त भयंकर उदासी हमर दिल के संकुचित कर देलकइ । की भाग्य हमन्हीं के फेर से काकेशिया में साथ लइलकइ, कि ऊ जान-बूझके हियाँ अइलइ, ई जानके, कि हमरा से मोलकात हो जइतइ ? ... आउ हमन्हीं के मोलकात कइसे होतइ ? ... आउ फेर, की ई ओहे हइ ? … हमर आशंका हमरा कभियो धोखा नयँ देलक ह । संसार में अइसन कोय व्यक्ति नयँ हइ, जेकरा पर अतीत एतना शासन जमा ले होतइ, जेतना हमरा पर। अतीत के शोक चाहे खुशी के स्मृति हमर आत्मा में दस्तक दे हइ आउ ओकरा में से ओहे सब ध्वनि निकास ले हइ ... हमर सृजन मूर्खतापूर्वक होल ह, हम कुच्छो भूल नयँ पावऽ हूँ - कुच्छो नयँ !
दुपहर के भोजन के बाद लगभग छो बजे हम बुलवार (boulevard) लगी रवाना होलिअइ । हुआँ परी भीड़भाड़ हलइ । राजकुमारी अपन बेटी के साथ बेंच पर बैठल हलथिन, नवयुवक लोग से घिरल, जेकन्हीं बीच उनकन्हीं के शुभकामना देवे लगी होड़ मच्चल हलइ । हम कुछ दूर एगो दोसर बेंच पर बैठल हलिअइ, डी॰ रेजिमेंट के दू गो परिचित अफसर के रोकलिअइ ... आउ उनकन्हीं साथ कुछ तो बतियाय लगलिअइ । स्पष्टतः ई हास्यजनक हलइ, काहेकि उनकन्हीं पागल नियन खिखियाय लगलथिन । उत्सुकता छोटकी राजकुमारी के घेरले नवयुवक लोग में से कुछ के हमरा दने आकृष्ट कइलकइ । धीरे-धीरे सब कोय उनका छोड़ देते गेलइ आउ हमर दल में शामिल हो गेते गेलइ । हम चुप नयँ होलिअइ - हमर खिस्सा में मूर्खता के हद तक चतुराई हलइ, हमरा भिर से गुजर रहल विलक्षण लोग पर के व्यंग्य निर्दयता के हद तक कटु हलइ ... हम सूर्यास्त होवे तक लोग के मनोरंजन करते रहलिअइ । कइएक तुरी छोटकी राजकुमारी अपन माय के साथ हाथ में हाथ डालले हमरा भिर से गुजरलथिन, जिनकर साथ में एगो कइसनो अपंग बुजुर्ग हलइ । कइएक तुरी हमरा पर पड़ल उनकर दृष्टि से झुंझलाहट अभिव्यक्त होब करऽ हलइ, लेकिन भावशून्यता प्रकट करे के प्रयास करते ...

"ऊ अपने के की कहब करऽ हलइ ?" नवयुवक लोग में से एगो के ऊ पुछलथिन, जे नम्रता के खियाल से उनका भिर लौट गेते गेले हल । "वास्तव में बहुत मनोरंजक कहानी - युद्ध में अपन पराक्रम के बारे ? ..." ऊ ई बात काफी जोर से बोललथिन, आउ शायद, हमरा पर व्यंग्य कस्से के मंशा से । "अहा !" हम सोचलिअइ, "अपने तो वास्तव में गोसाऽ हथिन, प्यारी राजकुमारी; दम लेथिन, अभी तो आउ कुछ होतइ !"
ग्रुशनित्स्की एगो हिंसक जानवर नियन उनका अपन दृष्टि से पिछुअइते रहलइ, आउ अपन दृष्टि के उनका पर से कभी अलगे नयँ कइलकइ - हम बाजी के साथ कहऽ हिअइ, कि बिहान ऊ केकरो से बड़की राजकुमारी के पास परिचय करावे लगी विनती करतइ । ऊ बहुत खुश होथिन, काहेकि ऊ बोर हो गेलथिन हँ ।

अनूदित साहित्य             सूची            पिछला                     अगला
 

No comments: