विजेट आपके ब्लॉग पर

Tuesday, June 06, 2017

विश्वप्रसिद्ध रूसी नाटक "इंस्पेक्टर" ; अंक-4 ; दृश्य-3

दृश्य-3
(ख़्लिस्ताकोव आउ आम्मोस फ़्योदरोविच)
आम्मोस फ़्योदरोविच - (अंदर अइते आउ रुकते, स्वगत) हे भगमान, हे भगमान ! सब कुछ निम्मन से पार लगइहऽ । हमर तो गोड़े जवाब दे रहल ह । (प्रकट, तनके खड़ी होते आउ अपन हाथ से तलवार पकड़ले) खुद के परिचय देवे में सम्मानित अनुभव करऽ हिअइ - हियाँ के जिला न्यायालय के न्यायाधीश (जज), कॉलेजिएट असेसर ल्यापकिन-त्यापकिन ।
ख़्लिस्ताकोव - किरपा करके बैठ जाथिन । त अपने हियाँ के जज हथिन ?
आम्मोस फ़्योदरोविच - सन् 1816 में कुलीन वर्ग (gentry) के इच्छानुसार तीन बरस लगी निर्वाचित होलिअइ आउ अभी तक सेवारत हिअइ ।
ख़्लिस्ताकोव - लेकिन जज होना की लाभदायक हइ ?
आम्मोस फ़्योदरोविच - तीन तुरी तिनबरसा अवधि के सेवा के बाद प्राधिकारी के अनुमोदन से हमरा सेंट व्लादिमीर पदक, चतुर्थ श्रेणी, से पुरस्कृत कइल गेलइ । (स्वगत) आउ हमर मुट्ठी में पैसा हके, आउ हमर मुट्ठी तो पूरा जल रहल ह ।
ख़्लिस्ताकोव - आउ हमरा पसीन पड़ऽ हइ व्लादिमीर । अइकी तेसरा दर्जा के आन्ना एकर परतर नयँ कर सकऽ हइ ।
आम्मोस फ़्योदरोविच - (अपन कसके बंद कइल मुट्ठी के जरी सुन आगू करते, स्वगत) हे भगमान ! हमरा समझ में नयँ आवऽ हके, कि हम काहाँ बैठल हकूँ । अइसन लगऽ हके कि हम बिलकुल दहकते कोयला के निच्चे हकूँ ।
ख़्लिस्ताकोव - ई अपने के हथवा में कउची हकइ ?
आम्मोस फ़्योदरोविच - (हड़बड़ाल आउ बैंक नोट के फर्श पर गिरइते) जी, कुछ नयँ ।
ख़्लिस्ताकोव - कुछ नयँ कइसे ? हम तो देखलिअइ, पैसा गिरलइ ।
आम्मोस फ़्योदरोविच - (सिर से पैर तक काँपते) जी, बिलकुल नयँ । (स्वगत) हे भगमान, अइकी अब तो हम कठघरा में खड़ी कर देल गेलूँ ! आउ हमरा गिरफ्तार करके ले जाय लगी गाड़ी भेजल जा चुकल ह !
ख़लिस्ताकोव - (फर्श पर से पैसा उठइते) हाँ, ई तो पैसा हइ ।
आम्मोस फ़्योदरोविच - (स्वगत) अरे, अब तो सब कुछ खतम हो गेल - हम तो बरबाद हो गेलूँ ! बरबाद !
ख़्लिस्ताकोव - अपने जन्नऽ हथिन की ? अपने ई हमरा उधार काहे नयँ दे दे हथिन ।
आम्मोस फ़्योदरोविच - (जल्दीबाजी में) जी, की कहलथिन; की कहलथिन ... बहुत खुशी से । (स्वगत) अब तो कुछ आउ साहस से काम ले, कुछ आउ साहस से ! हे पवित्र माता, हमर बेड़ा पार लगावऽ !
ख़्लिस्ताकोव - जानऽ हथिन, हमरा रस्ता में पैसा कमती पड़ गेलइ - कभी हियाँ, त कभी हुआँ ... लेकिन हम अपन गाँव से तुरतम्मे अपने हीं ई पैसा भेज देबइ ।
आम्मोस फ़्योदरोविच - ओह, एकर की जरूरत हइ ! एकरा बेगर भी ई हमर सम्मान के बात हइ ... वस्तुतः, अपन क्षमता कम होलो पर, उत्साह आउ जोश के साथ प्राधिकारी के ... सेवा में रत रहे के प्रयास करऽ हिअइ ... (कुरसी पर से उठ जा हका, तनके सावधान मुद्रा में हो जा हका) अपन उपस्थिति से अपने के आउ अधिक कष्ट देवे के साहस नयँ करऽ हिअइ । हमरा लगी कोय आदेश ?
ख़्लिस्ताकोव - कइसन आदेश ?
आम्मोस फ़्योदरोविच - हमर कहे के मतलब हइ, ई जिला न्यायालय (कोर्ट) लगी कोय आदेश देवे लगी चाहथिन ?
ख़्लिस्ताकोव - काहे लगी ? हमरा एकरा लगी कोय जरूरत नयँ हइ ।
आम्मोस फ़्योदरोविच - (झुकके आउ बाहर जइते, स्वगत) अच्छऽ, शहर अब हमन्हीं के हइ !
ख़्लिस्ताकोव - (उनकर गेला के बाद) जज तो एगो निम्मन व्यक्ति हइ !

सूची            पिछला                     अगला

No comments: